"Problemli kreditlər hələ kritik həddə çatmayıb"

Azərbaycanda problemli kreditlərin həcmi artıb. Belə ki, cari ilin mart ayının 1-nə vaxtı keçmiş kreditlər 81.9 milyon və ya 17.06% çoxalıb. Nəticədə sözügedən dövr ərzində həcm 562.0 milyon təşkil edib. Bununla yanaşı, bank sektorunda kreditləşmə prosesi aktiv şəkildə davam edir, kredit məhsulları geniş şəkildə təklif olunur və reklam edilir. Artımın davam etdiyini görürük. Maraqlıdır, problemli kreditlərin hazırkı həcmi bank sektoru üçün risk yarada bilər?

Bank məsələləri üzrə ekspert Əkrəm Həsənov Valyuta.az-a bildirib ki, bankların əsas qazanc mənbəyi kredit fəaliyyətidir. Bank kredit vermədiyi halda, onun aktiv fəaliyyət göstərməsi sual altına düşür.

"Sadəcə olaraq, banklar daha ehtiyatlı olmalıdır. Lakin bu, kreditlərin azaldılması anlamına gəlmir. Əksinə, elə vəziyyət yarana bilər ki, verilən kreditlərin ümumi məbləği artmağa davam etsin. Burada əsas məsələ kreditlərin kimə verilməsidir. Ümumilikdə isə, problemli kreditlərin artdığı dövrlərdə kredit portfelinin ümumi həcminin tədricən azalmağa doğru getməlidir və tədricən ona doğru da gedəcək. Hazırda banklar daha çox inertiya əsasında kredit verməyə davam edirlər. Yəni, problemli kreditlərin səviyyəsi hələ kritik həddə çatmayıb". 

Mayya Hüseynova