"Samsung" Cənubi Koreyada 648 milyard dollarlıq investisiyaya hazırlaşır

"Samsung" Qrupunun Cənubi Koreyada növbəti on il ərzində 1 000 trilyon von (təxminən 648 milyard ABŞ dolları) həcmində investisiya planı açıqlayacağı bildirilir. Məqsəd süni intellektin yaratdığı qlobal çip bumundan istifadə edərək ölkədə iqtisadi artımı sürətləndirməkdir.

Valyuta.az xəbər verir ki, plan Prezident Li Ce Myonq ilə keçiriləcək görüşdə təqdim olunacaq. Burada "Samsung Electronics" və "SK Hynix" rəhbərləri də iştirak edəcək və Seuldan kənar bölgələrə yönəlmiş investisiya layihələrini açıqlayacaqlar.

İnvestisiyalar süni intellekt məlumat mərkəzləri, batareya və displey layihələrini, həmçinin ölkənin cənub-qərbində yeni çip istehsalı zavodlarının tikintisi üçün nəzərdə tutulan təxminən 300 trilyon vonluq əlavə sərmayəni əhatə edəcək.

Hökumət hesab edir ki, yeni layihələr Seuldan kənar regionların iqtisadi inkişafını sürətləndirə bilər. Lakin ekspertlər infrastruktur çatışmazlığı və ixtisaslı işçi qüvvəsinin azlığının bu planların həyata keçirilməsini çətinləşdirəcəyini bildirirlər.

Müxalifət isə investisiya planının siyasi motivli olduğunu iddia edərək, hökuməti hakim partiyanın güclü dəstək aldığı bölgələrə üstünlük verməkdə ittiham edir.

Qeyd edək ki, Cənubi Koreya DRAM yaddaş çiplərinin istehsalında dünya liderlərindən biridir. Süni intellekt texnologiyalarının sürətli inkişafı isə bu sahəyə yatırımları daha da artırır.
"Samsung" və "SK Hynix" yayılan məlumatlarla bağlı şərh verməkdən imtina ediblər.

Rəfiqə Abdin