Startap ideyası tapmaq üçün təsisçilər haradan başlamalıdır? - 6 əsas mənbə

Bir çox insan startap qurmaq istəsə də, ilkin mərhələdə ideya tapmaqda çətinlik yaşayır. Problem adətən maliyyə və ya bacarıq çatışmazlığı deyil, hansı məhsul və ya xidmətin yaradılmalı olduğunu müəyyənləşdirə bilməməkdir.

Mütəxəssislərə görə, ideya tapmaq üçün təsadüfi axtarışdan çox, bazar məlumatlarının və real istifadəçi ehtiyaclarının təhlili vacibdir. Mövcud məhsulların nəticələrini izləmək, istifadəçi davranışlarını araşdırmaq və gündəlik problemləri müəyyənləşdirmək bu prosesdə əsas rol oynayır.

Əksər insanlar nəyəsə başlamazdan əvvəl ilişib qalır. Səbəb bacarıq və ya maliyyə çatışmazlığı deyil - əsas problem nə qurmalı olduqlarını müəyyənləşdirə bilməmələridir. Halbuki ideya tapmaq üçün konkret və açıq alətlər mövcuddur. H

Valyuta.az hazırda təsisçilərin istifadə etdiyi altı əsas mənbələri təqdim edir.

“TrustMRR” - gəlir gətirən məhsulları izləyin

“TrustMRR” startaplar bazasıdır və burada layihələrin gəliri ödəniş sistemlərinin API-ləri vasitəsilə təsdiqlənmiş şəkildə təqdim olunur. Rəqəmlər birbaşa “Stripe”, “LemonSqueezy” və ya “Polar” üzərindən yoxlanılır - əlavə hesabat və ya skrinşot tələb olunmur.

Platformada sahə və ya kateqoriya üzrə filtr tətbiq edərək (AI, SaaS, developer alətləri və s.) hansı məhsulların real gəlir əldə etdiyini görmək mümkündür: aylıq gəlir, artım dinamikası və bəzi hallarda satış göstəriciləri təqdim olunur. Bu yanaşma bazarda tələbin olub-olmadığını təxmin etməyə deyil, konkret rəqəmlərə əsaslanmağa imkan verir. Daha sonra məhsulun hansı problemi həll etdiyini, kimə yönəldiyini və qiymət modelini analiz edərək həmin sahəyə alternativ yanaşma ilə daxil olmağın mümkünlüyünü qiymətləndirmək olar.

“Google Trends” - maraq dinamikasını yoxlayın

“Google Trends” müəyyən mövzu üzrə axtarış sorğularının zamanla necə dəyişdiyini göstərir. Bu alət ideyanı sıfırdan yaratmaq üçün deyil, mövcud hipotezanı yoxlamaq üçün daha uyğundur: istifadəçilər bu problemin həllini axtarırmı və maraq artır, yoxsa azalır?

Axtarış sorğularını mümkün qədər konkret formalaşdırmaq vacibdir. Məsələn, “mühasibat proqramı” ümumi mənzərə yaradır, lakin auditoriyanı dəqiq göstərmir. “Fərdi sahibkarlar üçün mühasibat proqramı” kimi daha spesifik sorğu isə konkret ehtiyacı olan istifadəçiləri üzə çıxarır. Əgər belə sorğular üzrə maraq artım göstərirsə, bu, problemin aktuallığını təsdiqləyir.

“IdeasAI” - istifadəçi marağını ölçün

“ideasai.com” platformasında süni intellekt startap ideyaları yaradır, istifadəçilər isə bu ideyaları səsvermə yolu ilə qiymətləndirirlər. Daha çox səs toplayan ideyalar yuxarı sıralarda yerləşir və bu, real marağın göstəricisi kimi çıxış edir.

Bu yanaşma xüsusilə hansı sahədə fəaliyyət göstərmək istədiyini hələ müəyyənləşdirməmiş şəxslər üçün faydalıdır. İnsanların artıq hansı ideyaları dəstəklədiyini görmək bazar ehtiyacını anlamağa kömək edir. Yüksək səs toplayan ideyalar geniş yayılmış problemlərə işarə edir.

Şəxsi təcrübə - təkrarlanan tapşırıqları müəyyən edin

Gündəlik fəaliyyətinizdə mütəmadi olaraq təkrarlanan və vaxt aparan, lakin yüksək analitik düşüncə tələb etməyən tapşırıqları qeyd edin: məlumat toplama, hesabat hazırlama, standart yazışmalar, əl ilə çeşidləmə və s.

Əgər bu proseslər sizdən əhəmiyyətli vaxt alırsa, oxşar vəzifələrdə çalışan digər şəxslərin də eyni problemlə üzləşməsi ehtimalı yüksəkdir. Praktikada uğurlu məhsullar çox vaxt məhz bu cür konkret və gündəlik problemlərin həlli üzərində qurulur.

“Grok” (X platforması) - real vaxt şikayətləri analiz edin

“Grok” X platformasında fəaliyyət göstərən süni intellekt köməkçisidir və açıq paylaşımlar əsasında real vaxt məlumatlarını analiz edə bilir. Bu alət vasitəsilə istifadəçilərin hazırda hansı problemlərlə üzləşdiyini öyrənmək mümkündür.

Məsələn, “Marketoloqları iş prosesində ən çox nə çətinləşdirir?” və ya “Təsisçilər hansı prosesləri avtomatlaşdırmaq istəyir?” kimi suallar verərək aktual problemlərin xülasəsini əldə etmək olar. İstifadəçilər tez-tez iş proseslərindəki çətinlikləri və mövcud alətlərin çatışmazlıqlarını açıq şəkildə bölüşürlər.

“Reddit” - real istifadəçi şikayətlərini araşdırın

“Reddit” müxtəlif mövzular üzrə minlərlə icmanı birləşdirən platformadır və istifadəçilər burada problemlərini açıq müzakirə edirlər. Digər platformalardan fərqli olaraq, burada kommersiya məqsədli təqdimatlar minimumdur — əsas diqqət real təcrübələrə yönəlib.

İstifadəçilər hansı alətlərin çatışmadığını, mövcud həllərin hansı tərəflərinin onları qane etmədiyini və hansı məhsullara pul xərcləyib narazı qaldıqlarını açıq şəkildə ifadə edirlər. Eyni problemin dəfələrlə təkrar olunması bazarda boşluğun mövcudluğuna işarə edir.

Mayya Hüseynova