Süni intellekt dünyanın ən təhlükəsiz əməliyyat sistemlərindən birini sındırıb

Açıq mənbəli "FreeBSD" əməliyyat sistemində kritik boşluq süni intellekt vasitəsilə cəmi bir neçə saat ərzində istismar edilib.

Valyuta.az xəbər verir ki,, süni intellekt sistemi təhlükəsizlik xəbərdarlığı əsasında hərəkət edərək boşluğu analiz edib və sıfırdan işlək hücum mexanizmi hazırlayıb. Nəticədə sistemə tam nəzarət imkanı verən “root access” əldə olunub.

Məlumata görə, bu boşluq "Claude AI" modelindən istifadə edən tədqiqatçı tərəfindən aşkarlanıb. Lakin əsas diqqət çəkən məqam süni intellektin təkcə problemi müəyyən etməsi deyil, həm də onu real hücuma çevirməsi olub.

Ekspertlər bildirir ki, bu hadisə süni intellektin artıq yalnız köməkçi alət deyil, eyni zamanda müstəqil şəkildə kiberhücum həyata keçirə bilən vasitəyə çevrildiyini göstərir.

Mütəxəssislərin fikrincə, bu, kibertəhlükəsizlik sahəsində yeni mərhələnin başlanğıcı hesab olunur. Belə ki, əvvəllər həftələr tələb edən hücumların hazırlanması prosesi artıq saatlar ərzində həyata keçirilə bilər.

Bununla yanaşı, təhlükəsizlik sistemlərinin zəif tərəflərinin daha sürətli aşkarlanması və istismarı ehtimalı da artıb. Bu isə şirkətlərin və dövlət qurumlarının müdafiə mexanizmlərini yenidən nəzərdən keçirməsini zəruri edir.

Sərvanə Rəmixanova