Adsız bizneslər - Onların hədəfi yoxdur?

Bəzən şəhərin mərkəzi küçələrində yerləşən bir çox bizneslərdə bu mənzərə müşahidə olunur: bəzi obyektlər sadəcə “Market”, “Salon”, “Kafe” kimi ümumi adlarla fəaliyyət göstərir. Yəni onlara xüsusi brend adı verilməyib.

Bu isə sual yaradır: Biznes ümumilikdə düzgün yerdə yerləşirsə, ad və loqo çox əhəmiyyət daşımır, yoxsa bunlar hədəfsiz bizneslərdir? Yəni, mövcud vəziyyət onlar üçün kifayət edir?          

Marketinq və brend inkişafı üzrə türkiyəli mütəxəssis Burak Kölemen Valyuta.az-a bildirib ki, ticarət mütləq xüsusi bir marka və ya marka strategiyası üzərindən aparılmalıdır deyə bir zərurət yoxdur:

"Bu səbəbdən qısa müddətdə ən yüksək gəliri əldə etməyə üstünlük verənlər, yəni "su axarkən vedrəsini doldurmaq" istəyənlər, markalaşmağa vaxt sərf etmirlər. Onlar ən sürətli, ən aşağı xərcli və ən qısa yolu seçirlər. Bu yanaşma, işini bu model üzərində quranlar üçün son dərəcə təbiidir və öz daxilində doğrudur.

Məsələn, “Sədərək”də mağaza açanların lövhə adlarına baxsanız, çox vaxt "15-ci sıra, 3-cü dükan" kimi ifadələr görərsiniz. Çünki burada addan daha çox qiymət-performans önəmlidir. Eyni məhsulu ən uyğun qiymətə təqdim edə bilmək, bu ticarəti etmək istəyənlər üçün əsas bacarıq sayılır”.

Mayya Hüseynova