"Unibank"ın aktivləri 22%-ə yaxın artıb, kredit və depozit portfeli genişlənib

2026-cı ilin I rübünün yekunlarına əsasən, "Unibank"ın cəmi aktivləri 2 milyard 196 milyon 864 min manat təşkil edib.

Valyuta.az xəbər verir ki, bankın aktivləri 2025-ci ilin eyni dövrü ilə müqayisədə 393 milyon 481 min manat və ya 21,8% artıb. Ötən ilin müvafiq dövründə bu göstərici 1 milyard 803 milyon 383 min manat olub.

Hesabat dövründə bankın nağd pul vəsaitləri və onların ekvivalentləri, o cümlədən bloklaşdırılmış nağd vəsaitləri 363 milyon 794 min manata yüksəlib. Bu göstərici illik müqayisədə 138 milyon 555 min manat və ya 61,5% çoxdur. 2025-ci ilin I rübünün sonunda həmin vəsaitlərin həcmi 225 milyon 239 min manat təşkil edib.

"Unibank"ın kredit portfeli də artım nümayiş etdirib. Belə ki, 2026-cı ilin I rübünün sonuna müştərilərə verilmiş kreditlərin həcmi 1 milyard 373 milyon 787 min manat olub. Bu, əvvəlki ilin eyni dövrü ilə müqayisədə 203 milyon 448 min manat və ya 17,4% çoxdur. 2025-ci ilin I rübündə bankın kredit portfeli 1 milyard 170 milyon 339 min manat səviyyəsində olub.

Bankın öhdəlik bazasında da genişlənmə qeydə alınıb. Belə ki, cəmi depozitlər 2026-cı ilin I rübünün yekununda 1 milyard 378 milyon 499 min manat təşkil edib. Bu göstərici 2025-ci ilin eyni dövründəki 1 milyard 205 milyon 280 min manatla müqayisədə 173 milyon 219 min manat və ya 14,4% artım deməkdir.

Tənzilə Ağabalayeva