“Amazon”un fulfillment rəqibi “Stord” 3 milyard dollar dəyərləndirmə ilə 250 milyon dollar investisiya cəlb edib

Elektron ticarət logistikası sahəsində fəaliyyət göstərən “Stord” şirkəti 250 milyon dollarlıq yeni investisiya raundunu tamamladığını çərşənbə axşamı elan edib. Bu göstərici şirkətin bir il əvvəlki investisiya raundu ilə müqayisədə dəyərləndirməsinin iki dəfə artdığını göstərir.

Yeni maliyyələşdirmə raunduna “Strike Capital” rəhbərlik edib. Raundda həmçinin “Kleiner Perkins”, “Founders Fund”, “Franklin Templeton”, “Baillie Gifford”, “G Squared” və “Bond” iştirak edib.

“Stord” şirkəti 2015-ci ildə “Georgia Tech” universitetində təhsil alan tələbələr — baş icraçı direktor Şon Henri və texnologiya direktoru Ceykob Budro tərəfindən təsis olunub. Gənc təsisçilərin rəhbərlik etdiyi şirkət pandemiya dövründə vençur kapitalı bazarındakı sürətli yüksəlişdən faydalanaraq inkişaf edib və 2021-ci ildə “unicorn” statusu qazanıb.

Startap sonrakı dövrdə vençur kapitalı bazarında yaşanan durğunluqdan sağ çıxmağı bacarıb və 2025-ci ildə yenidən “Strike Capital”ın rəhbərlik etdiyi 200 milyon dollarlıq iri investisiya raundu keçirərək dəyərləndirməsini 1,5 milyard dollara çatdırıb. Şirkət bu günədək ümumilikdə təxminən 775 milyon dollar investisiya cəlb edib.

“Stord” elektron ticarət üçün fiziki anbar şəbəkəsi və inventar idarəetmə proqram təminatı təqdim edir. Şirkət özünü “Amazon”a alternativ kimi təqdim edir və markalara müştəri münasibətlərinə nəzarəti qoruyaraq “rəqabət aparmaq üçün sürət” qazandırdığını bildirir.

Süni intellekt dövründə Atlantada yerləşən fulfillment startapı proqram təminatına süni intellekt interfeysi əlavə etdikdən sonra yenidən diqqət mərkəzinə düşüb. Şirkət bu ilin aprel ayında keçirilən “Google Cloud Next” konfransında da “Google” tərəfindən xüsusi olaraq vurğulanıb.

Tənzilə Ağabalayeva