Bütün "iPhone"lar sınaqdan keçirildi: Ən yaxşı modeil açıqlandı

CNN jurnalistləri "Apple" şirkətinin bütün mövcud "iPhone" seriyasını sınaqdan keçirərək müxtəlif istifadə ssenariləri üçün ən yaxşı modelləri müəyyən ediblər. Nəticələrə əsasən, 2026-cı ilin yazı üçün ən optimal seçim standart "iPhone 17" modeli olub.

Valyuta.az xəbər verir ki, ekspertlərin fikrincə, "Apple" “adi” "iPhone" ilə Pro modellər arasındakı fərqi xeyli azaldıb. "iPhone 17" 120 herslik ProMotion ekran, güclü A19 prosessoru, yaxşılaşdırılmış batareya ömrü və əvvəllər yalnız bahalı modellərə məxsus olan kamera funksiyaları ilə təchiz edilib. Üstəlik, cihaz Pro versiyadan 200 dollar ucuzdur.

Mütəxəssislər bildiriblər ki, "iPhone 17" "iPhone 15" və daha köhnə modellərdən istifadə edənlər üçün açıq-aşkar yenilənmədir. Hətta "iPhone 16" sahibləri üçün də bir sıra nəzərəçarpacaq təkmilləşdirmələr təqdim edir.

"iPhone 17 Pro" isə “mobil fotoqrafiya üçün ən yaxşı "iPhone” kimi qiymətləndirilib. Bu model daha inkişaf etmiş kamera sistemi və peşəkar çəkiliş imkanları təklif edir. "iPhone 17 Pro Max" isə ən yüksək batareya ömrü ilə fərqlənərək seriyanın “ən dözümlü” cihazı adlandırılıb.

Daha ucuz seçim axtaranlar üçün "iPhone 17e" modeli tövsiyə olunur. Bu versiyada əvvəlki nəsildəki əsas çatışmazlıqlar aradan qaldırılıb, MagSafe dəstəyi əlavə edilib və baza yaddaş 256 GB-a qədər artırılıb, lakin başlanğıc qiymət 599 dollar olaraq saxlanılıb.

Oxşar nəticələr digər texnologiya nəşrləri tərəfindən də dəstəklənir. “Tom’s Guide” və “Engadget” də "iPhone 17"ni qiymət-performans baxımından ən yaxşı seçim, "iPhone 17 Pro Max"ı isə kamera və batareya baxımından ən güclü model kimi qiymətləndiriblər.

Qeyd olunur ki, "Apple" yaxın günlərdə "iPhone 17" seriyasının indiyədək ən populyar "iPhone xətti" olduğunu açıqlayıb. Yüksək tələb şirkətə satış həcminə görə "Samsung"u geridə qoymağa da kömək edib.

Paşa Məmmədli