Avropada 6 elektrik mühərrikli inqilabi sərnişin təyyarəsi layihəsi təqdim olundu

Niderland startapı “Elysian Aircraft” regional aviasiyada inqilab yarada biləcək “E9X” adlı elektrik təyyarəsinin yenilənmiş konseptini təqdim edib. 

Valyuta.az xəbər verir ki, bu barədə “FlightGlobal” məlumat yayıb.

Şirkət uzun müddətdir elektriklə işləyən sərnişin təyyarəsi üzərində işləyir. Daha əvvəl təqdim edilən konseptdə səkkiz mühərrik nəzərdə tutulurdu, lakin yenilənmiş dizaynda onların sayı altıya endirilib.

Yeni “E9X” təyyarəsinin təxminən 90–100 sərnişin daşıması və 750 kilometrdən çox məsafəni qət etməsi planlaşdırılır. Batareya texnologiyalarının inkişafından sonra bu göstəricinin 1000 kilometrə qədər artırılması hədəflənir.

Layihənin əsas məqsədi demək olar ki, sıfır emissiya və daha aşağı istismar xərclərinə nail olmaqdır.

Şirkətin təqdim etdiyi konseptin əsas xüsusiyyətlərindən biri qanad boyunca yerləşdirilmiş paylanmış elektrik itələmə sistemi və batareyaların vahid strukturda inteqrasiya edilməsidir. Mütəxəssislərin məlumatına görə, sertifikasiya tələbləri üçün əlavə olaraq təcili turbina sistemi də nəzərdə tutulur.

“Elysian Aircraft” artıq kiçik miqyaslı nümayiş modelində uçuş sınaqları keçirib və aerodinamika, sabitlik və elektrik güc sisteminin işləməsini təsdiqləyib. Bu, layihənin nəzəri mərhələdən daha praktik mühəndislik mərhələsinə keçməsinə imkan yaradıb.

Təyyarənin 2030-cu illərdə istifadəyə verilməsi planlaşdırılır. Bu dövr batareya texnologiyalarında gözlənilən sıçrayışla üst-üstə düşür.

Qeyd edək ki, son illərdə elektrik aviasiyası sahəsində rəqabət artır. Daha əvvəl Rusiyanın Kazan şəhərində “Tu-454” sərnişin təyyarəsinin maketi təqdim olunmuşdu. Bundan əlavə, “MS-21-500” layihəsi də genişləndirilmiş gövdəli yeni nəsil təyyarə kimi təqdim edilib.

Paşa Məmmədli