Azərbaycanda geniş pul kütləsi 50 milyard manatı keçib

Azərbaycanda geniş mənada pul kütləsi (M3) aqreqatı bu ilin aprel ayının sonuna 50 milyard 168,1 milyon manat təşkil edib.

Valyuta.az xəbər verir ki, bu göstərici mart ayı ilə müqayisədə 188,7 milyon manat və ya 0,4% artıb. Mart ayında M3 aqreqatı 49 milyard 979,4 milyon manat olmuşdu.

İllik müqayisədə isə geniş mənada pul kütləsində 2 milyard 960,4 milyon manat və ya 6,3% artım qeydə alınıb.

Belə ki, ötən ilin aprel ayında M3 aqreqatı 47 milyard 207,7 milyon manat səviyyəsində olub.

Hesabat dövründə manatla olan pul kütləsi (M2) aqreqatı 40 milyard 480,4 milyon manata yüksəlib. Bu göstərici aylıq müqayisədə 479,9 milyon manat və ya 1,2% artım deməkdir.

Mart ayında M2 aqreqatı 40 milyard 000,5 milyon manat təşkil etmişdi.

Ötən ilin eyni dövrü ilə müqayisədə isə manatla pul kütləsi 5 milyard 041,6 milyon manat və ya 14,2% artıb.

Ötən ilin aprel ayında bu göstərici 35 milyard 438,8 milyon manat olub.

Banklardan kənarda olan nağd pul kütləsi (M0) aqreqatı isə aprel ayında 18 milyard 331,9 milyon manat təşkil edib.

Bu göstərici aylıq müqayisədə 30,9 milyon manat və ya 0,2% azalıb. Mart ayında banklardan kənarda olan nağd pul kütləsi 18 milyard 362,8 milyon manat olub.

Bununla yanaşı, illik müqayisədə M0 aqreqatı üzrə 2 milyard 285,6 milyon manat və ya 14,2% artım müşahidə edilib.

Ötən ilin aprel ayında banklardan kənarda olan nağd pul kütləsi 16 milyard 046,3 milyon manat təşkil etmişdi.

Tənzilə Ağabalayeva