Azərbaycanlı hüquqşünas xarici bazarlara çıxışı asanlaşdıran hüquq platforması qurub

Azərbaycandan olan hüquqşünas Mirzə Çıraqov hüquq və texnologiyanı bir araya gətirən yeni təşəbbüslə diqqət çəkib. Onun təsisçilərindən biri olduğu layihə müxtəlif ölkələrin hüquqi mühitinə çıxışı daha rahat, sürətli və əlçatan etməyə hesablanıb.

Valyuta.az xəbər verir ki, yeni platforma şirkətlərə, investorlara və hüquq mütəxəssislərinə xarici ölkələrin qanunvericiliyi, vergi qaydaları, biznes şərtləri və hüquqi prosedurları barədə ilkin məlumat toplamaqda kömək edir. Mirzə Çıraqov qeyd edib ki, bu isə yeni bazara daxil olmaq istəyənlər üçün ilk mərhələni sadələşdirə, vaxt itkisini azalda və ilkin xərcləri aşağı sala bilər.

M.Çıraqovun sözlərinə görə, bizneslərin xarici bazarlara çıxışı zamanı əsas çətinliklərdən biri hüquqi baryerlərdir: "Fərqli ölkələrin qaydalarını öyrənmək, riskləri qiymətləndirmək və düzgün qərar vermək üçün etibarlı məlumat bazasına ehtiyac var. Layihə çərçivəsində istifadəçilər başqa ölkələrin hüquq sistemi ilə tanış ola, bazar risklərini daha operativ qiymətləndirə və hansı istiqamətdə addım atmalı olduqlarını müəyyənləşdirə bilərlər". 

M.Çıraqov bildirib ki, bu cür həllər xüsusilə kiçik və orta biznes üçün xarici bazara çıxış prosesini daha real və əlçatan edə bilər.

Layihənin formalaşdırdığı komandada təkcə yerli mütəxəssislər deyil, eyni zamanda Avropa, ABŞ, Kanada və Böyük Britaniyadan ekspertlər də təmsil olunur. O əlavə edib ki, bu isə təşəbbüsün beynəlxalq əməkdaşlıq imkanlarına malik olduğunu və daha geniş bazarı hədəflədiyini göstərir.

"Hazırda əsas diqqət Azərbaycan bazarına yönəlsə də, gələcək mərhələdə platformanın Gürcüstan, Qazaxıstan və Özbəkistan kimi ölkələri də əhatə etməsi planlaşdırılır", - deyə o əlavə edib.

Mütəxəssislərin fikrincə, hüquq sahəsində rəqəmsal həllərin artması yaxın illərdə həm hüquqi xidmət bazarında rəqabəti gücləndirə, həm də biznes mühitində şəffaflıq və operativliyi artırmağa töhfə verə bilər.

©The Tech