“Meqa Sığorta”nın yığımları 7,7% azalıb, ödənişləri 13,1% artıb

“Meqa Sığorta” ASC-nin cari ilin ilk 4 ayında sığorta haqları üzrə yığımları azalsa da, ödənişlərin artması fonunda zərərlilik göstəricisi yüksəlib.

Valyuta.az xəbər verir ki, sığorta şirkətinin 2026-cı ilin yanvar-aprel aylarında topladığı sığorta haqları ötən ilin eyni dövrü ilə müqayisədə 785 min manat və ya 7,73% azalaraq 9 milyon 373 min manat təşkil edib. Şirkət 2025-ci ilin ilk 4 ayında 10 milyon 158 min manat sığorta haqqı toplayıb.

Hesabat dövründə sığorta ödənişlərində isə artım qeydə alınıb. Belə ki, “Meqa Sığorta” ötən ilin yanvar-aprel aylarında 5 milyon 64 min manat ödəniş etdiyi halda, bu göstərici cari ilin eyni dövründə 663 min manat və ya 13,09% artaraq 5 milyon 727 min manata yüksəlib.

Nəticədə şirkətin zərərlilik göstəricisi də artıb. Hesablamalara əsasən, “Meqa Sığorta” cari ilin ilk 4 ayında topladığı hər 100 manat sığorta haqqının 61,10 manatını ödənişlərə yönəldib. Ötən ilin eyni dövründə isə bu göstərici 49,85 manat təşkil edib.

Sərvanə Rəmixanova