Bir səhmin perspektivli olub-olmadığını necə müəyyən etmək olar?

İnvestisiya etməyə maraq göstərən və vəsaitlərini səhm bazarında dəyərləndirmək istəyən şəxslərin sayı getdikcə artır. İnvestorlar arasında belə bir fikir var ki, “ən böyük qazanclar məhz bahalı görünən səhmlərdən gəlir”. 

Ümumiyyətlə, bir səhmin perspektivli və gəlirli olub-olmadığını necə müəyyən etmək olar?

İqtisadçı Rəşad Həsənov Valyuta.az-a bildirib ki, ümumilikdə, səhmin qiymətinin yüksək olması ilə onun perspektivləri arasında müəyyən korrelyasiya mövcuddur və bu, müəyyən məntiqi asılılıq yaradır:

"Belə ki, səhmin baha olması çox vaxt şirkətin daha etibarlı olması, bazarda uzun müddət fəaliyyət göstərməsi və daha yüksək qiymətlə vəsait cəlb edə bilməsi ilə əlaqələndirilir. Bununla yanaşı, məsələnin texniki tərəfi də nəzərə alınmalıdır. Şirkət səhmləri emissiya edərkən ümumi dəyər emissiya edilən səhmlərin sayına bölünərək bir səhmin ilkin qiyməti müəyyən olunur. Səhmlərin sayı nə qədər çox olarsa, bir səhmin qiyməti bir o qədər aşağı olur. Bu səbəbdən bazarda bəzən səhmin aşağı və ya yüksək qiyməti yanıltıcı təsir yarada bilər. Peşəkar investorlar üçün əsas tövsiyə şirkətin fundamental göstəricilərinə diqqət yetirməkdir. Buraya şirkətin innovativliyi, bazara təqdim etdiyi həllər, məhsul və xidmətlərin keyfiyyəti, rəqabət qabiliyyəti, idarəetmədə şəffaflıq və korporativ idarəetmə modelinin müasir tələblərə uyğunluğu daxildir".

R.Həsənov qeyd edib ki, müasir dövrdə xüsusilə rəqəmsal texnologiyalar və süni intellekt sahəsində fəaliyyət göstərən şirkətlərin perspektivləri daha yüksək qiymətləndirilir:

"Bu tip şirkətlərin səhmlərində artım potensialı ənənəvi sektorlarla müqayisədə daha yüksək ola bilər. Eyni zamanda, nəzərə alınmalıdır ki, bazar və istehlak strukturu sürətlə dəyişir. Əgər şirkətin məhsul və ya xidmətlərinə orta və uzun müddətli dövrdə tələbat azalarsa, bu, şirkətin perspektivlərinə mənfi təsir göstərir və nəticədə səhmlərin ucuzlaşmasına səbəb olur. Bu baxımdan, hər hansı səhmi almaqdan əvvəl şirkətin fəaliyyətinin dərin təhlili, bazar konyunkturasının qiymətləndirilməsi və perspektivlərin aydın şəkildə müəyyən olunması vacibdir. Səhmin ucuz və ya baha olması isə təkbaşına həlledici meyar hesab edilmir. Bundan əlavə, keçmiş məlumatların təhlili də müəyyən siqnallar verə bilər. Əgər səhmin qiymətində davamlı artım müşahidə olunursa, bu, bazar trendinin göstəricisi kimi ilkin qərarvermədə nəzərə alına bilər".

"Nəticə etibarilə, bütün bu amillərin kompleks şəkildə təhlili investorun daha əsaslandırılmış qərar qəbul etməsinə imkan yaradır və gələcəkdə səhmlərin daha yüksək qiymətə satılması və ya dividendlər vasitəsilə gəlir əldə olunması ehtimalını artırır", - deyə ekspert əlavə edib.

Mayya Hüseynova