"Böhran dövründə belə, əməkdaşları dərhal ixtisar etmək çıxış yolu sayılmamalıdır"

Dünyada, eləcə də Azərbaycandakı şirkətlərdə ixtisarları zaman-zaman görürük. Bu hallarda işdən çıxarılan əməkdaşların iş yükü adətən kollektivdə qalan işçilərin üzərinə düşür.

Bəs ixtisar qərarları uzunmüddətli perspektivdə şirkətin fəaliyyətinə və effektivliyinə necə təsir edir?

Valyuta.az-a danışan biznes konsultant və idarəçi Anar Bayramov bildirir ki, ixtisar bəzən qaçılmaz olsa da, bu qərar verilərkən bir sıra mühüm məqamlar nəzərə alınmalıdır: "İlk növbədə ixtisarların şirkət daxilində yaratdığı psixoloji və institusional təsirlər düzgün hesablanmalıdır.

Şirkət ixtisarların təşkilati mədəniyyətə və ümumi iş mühitinə təsirini əvvəlcədən qiymətləndirməlidir. İxtisar yalnız işdən çıxarılan əməkdaşlara deyil, işdə qalanlara da təsir edir. Bu, kollektivdə suallar yaradır və şirkətə olan etibarı sarsıda bilər. Ona görə də, həm işə qəbul, həm də ixtisar qərarlarında maksimum məsuliyyətli olmaq və bütün həssas məqamları nəzərə almaq vacibdir. İxtisarın səbəbi və məntiqi yalnız çıxarılan əməkdaşlara deyil, imkan daxilində kollektivdə qalanlara da izah olunmalıdır”.

Ekspert vurğulayır ki, ixtisar qərarları emosional və ya panika fonunda qəbul edilməməlidir: "Bəzən qısamüddətli çətinliklər panikaya səbəb olur və şirkətlər kəskin addımlar atır. Bu, düzgün yanaşma deyil. Hətta böhran dövründə belə, əməkdaşları dərhal ixtisar etmək çıxış yolu sayılmamalıdır. Əmin olmaq lazımdır ki, bu addım həqiqətən zəruridir və alternativlər tükənib”.

A.Bayramovun fikrincə, mütəmadi ixtisarlar şirkət üçün daha ciddi risklər yaradır: "Davamlı ixtisarlar şirkətin qeyri-sabit və proqnozlaşdırıla bilməyən olduğunu göstərir. Bu isə əməkdaşlarda inamın azalmasına gətirib çıxarır. Ona görə də insan resursları əvvəlcədən düzgün dizayn olunmalı və planlaşdırılmalıdır”. 

Ekspert qeyd edir ki, ixtisardan sonra qalan əməkdaşların üzərinə düşən əlavə yük də xüsusi diqqət tələb edir:

“İş yükünün artması müəyyən hallarda qaçılmazdır. Amma əsas məsələ balansın qorunmasıdır. Əgər işçinin həyatında dəyişən yeganə şey iş yükünün artmasıdırsa, bu, nə dayanıqlıdır, nə də ədalətlidir. Belə vəziyyətlərdə müəyyən qırılmalar yaranır. Buna görə də işçilər paralel olaraq rifahlarında müsbət dəyişiklik hiss etməli və ya ən azı bunun üçün real perspektiv görməlidirlər”.

A.Bayramov sonda qeyd etdi ki, ixtisar yalnız maliyyə qərarı deyil, eyni zamanda insan kapitalına və şirkətin gələcək dayanıqlılığına birbaşa təsir edən strateji addımdır: "Buna görə də bu prosesə həm iqtisadi, həm də insani yanaşma ilə yanaşmaq vacibdir".

Sərvanə Rəmixanova