İlk 5 ayda nağd xarici valyuta alışı satışdan 311 milyon dollar çox olub

Cari ilin ilk beş ayında mübadilə şöbələri tərəfindən nağd xarici valyutanın alışı satışını 311 milyon ABŞ dolları üstələyib.

Valyuta.az Mərkəzi Banka istinadən xəbər verir ki, hesabat dövründə əhalinin xarici valyutaya marağında da azalma qeydə alınıb.

Belə ki, rezident fiziki şəxslərin əmanətlərinin dollarlaşma səviyyəsi son 12 ayda 2,8% bəndi azalaraq 2026-cı ilin may ayında 27%-ə enib.

Ölkəyə daxil olan pul köçürmələrinin həcmində isə artım müşahidə edilib. Yanvar-may aylarında xaricdən Azərbaycana göndərilən pul baratlarının həcmi ötən ilin müvafiq dövrü ilə müqayisədə 28,8% artaraq 560,1 milyon ABŞ dollarına çatıb.