Uğurlu insanların həmişə dəqiq planı olmur

Bir çox insan uğur qazanmaq üçün əvvəlcədən dəqiq plan qurmağın vacib olduğuna inanır.

Lakin insanların əksəriyyəti plansız olduqları üçün deyil, hərəkətə keçməzdən əvvəl tam aydınlıq gözlədikləri üçün yerində sayırlar.

Valyuta.az xəbər verir ki, Biznes məsləhətçisi Paula Blankenship bildirib ki, aydınlıq çox vaxt plan qurmaqla deyil, hərəkət etməklə yaranır. Onun sözlərinə görə, irəliləmək üçün hər şeyi əvvəlcədən bilmək vacib deyil.

Qərarla başlayın, planla yox

Ekspertin fikrincə, insanlar plan olmadıqda daha çox araşdırmağa, analiz etməyə və gözləməyə meylli olurlar. Halbuki əsas məsələ növbəti addımı müəyyənləşdirməkdir.

"Qarşıdakı 10 addımı deyil, yalnız növbəti addımı müəyyən edin", - deyə Blankenship vurğulayır.

Hərəkət aydınlıq yaradır

Mütəxəssis hesab edir ki, insanlar çox vaxt aydınlıq əldə etdikdən sonra hərəkət edəcəklərini düşünürlər. Lakin təcrübə göstərir ki, əksər hallarda proses əksinə işləyir və aydınlıq məhz hərəkət zamanı formalaşır.

Kiçik addımlarla irəliləyin

Ekspert böyük dəyişikliklərə fokuslanmaq əvəzinə kiçik addımlar atmağı tövsiyə edir. Onun sözlərinə görə, hər bir kiçik addım yeni məlumat və təcrübə qazandırır, bu da sonrakı qərarların daha düzgün verilməsinə kömək edir.

Blankenship bildirir ki, uğurlu insanlar həmişə dəqiq plana malik olmurlar. Onları fərqləndirən əsas cəhət qeyri-müəyyənlik şəraitində belə hərəkətə keçmək bacarığıdır.

Sərvanə Rəmixanova