Maaş artımı tələbiniz qəbul olunmadısa, nə etməlisiniz?

Maaş artımı ilə bağlı müraciətin rədd edilməsi əməkdaşlar üçün məyusedici ola bilər. Lakin mütəxəssislər bildirirlər ki, belə qərar hər zaman işçinin performansı ilə bağlı olmur və bunun arxasında müxtəlif səbəblər dayana bilər.

İnflyasiyanın təsiri ilə maaş artımları işçilər üçün daha da vacib hala gəlsə də, bəzi şirkətlər büdcə məhdudiyyətləri və ya digər səbəblərə görə əməkhaqqını artırmır.

Valyuta.az xəbər verir ki, ekspertlər belə hallarda emosional reaksiya vermək əvəzinə, qərarın səbəblərini araşdırmağı tövsiyə edirlər.

Maaş artımının rədd edilməsinin əsas səbəbləri

Mütəxəssislərin fikrincə, ən çox rast gəlinən səbəblərdən biri müraciət üçün uyğun vaxtın seçilməməsidir. Şirkətlərdə maaş qərarları adətən müəyyən dövrlərdə verilir və bu vaxtdan kənar müraciətlər rədd oluna bilər.

Digər səbəb şirkətin maliyyə vəziyyəti ilə bağlı ola bilər. Bəzi hallarda işçinin performansı yüksək olsa belə, şirkətin büdcəsi əlavə maaş artımına imkan vermir.

Ekspertlər həmçinin qeyd edirlər ki, bəzi əməkdaşlar öz nailiyyətlərini rəhbərliyə kifayət qədər göstərmir. Bu isə rəhbərlərin işçinin şirkətə verdiyi töhfələri tam qiymətləndirə bilməməsinə səbəb olur.

Nə etmək lazımdır?

Mütəxəssislər maaş artımı ala bilməyən əməkdaşlara ilk növbədə rəhbərlə açıq söhbət etməyi və qərarın səbəblərini öyrənməyi tövsiyə edirlər.

Bundan əlavə, işçilər gələcəkdə maaş artımı əldə etmək üçün hansı göstəricilərə nail olmalı olduqlarını dəqiqləşdirməli, öz nailiyyətlərini sənədləşdirməli və performanslarını ölçülə bilən nəticələrlə təqdim etməlidirlər.

Nələrdən çəkinmək lazımdır?

Ekspertlər bildirirlər ki, maaş artımının rədd edilməsindən sonra emosional qərarlar vermək düzgün deyil. İşdən dərhal ayrılmaq, iş tempini azaltmaq, rəhbərlik və ya həmkarlar haqqında mənfi danışmaq vəziyyəti daha da çətinləşdirə bilər.

Əgər əməkdaş hesab edirsə ki, bazar dəyərinə uyğun maaş almır və şirkətdə inkişaf imkanları məhduddur, bu halda yeni iş imkanlarını araşdırmaq da alternativ variantlardan biri hesab olunur.

Maaş artımından imtina cavabı karyeranın sonu deyil. Əksinə, bu qərar işçinin inkişaf etməli olduğu istiqamətləri müəyyənləşdirməsi və gələcək addımlarını planlaşdırması üçün fürsət ola bilər.

Sərvanə Rəmixanova