“500 manatdan az büdcə ilə biznesdə ilkin addım atmaq realdır”

Ətrafımızda biznes quran şəxslərlə söhbət etdikdə və ya biznes müsahibələrinə diqqət etdiyimiz zaman biznesə yatırılan ilkin büdcə diqqətimizi çəkir. Əgər bir şəxs "az büdcə ilə bu işə başladım", "500 manatla bu yola addım atdım" və s. kimi cümlələr deyirsə, bunu əzmkarlıq nümunəsi kimi görənlər olsa da, kiçik məbləğlərlə biznes qurmağın mümkün olmadığını deyənlər də az deyil.

Bəs kiçik büdcə ilə biznesə başlamaq realdır, yoxsa sadəcə danışılan hekayədir?

Valyuta.az-a danışan “Mediamark” Digital Agentliyinin təsisçisi Orxan Rzayev bildirib ki, burada əsas baxılmalı məqam hansı biznesdən söhbət getməsidir: "Söhbət əgər zavod və ya fabrik açmaqdan gedirsə, təbii ki, burda ciddi büdcədən söhbət getməlidir. Çünki zavod qurmağa böyük vəsaitlər lazımdır. Əgər müasir bizneslər, yəni, onlayn platforma və xidmətlər nəzərdə tutulubsa, indiki zamanda nəinki 500 manatla, daha az büdcə ilə ilkin addım atmaq realdır”.

Ekspert bildirir ki, süni intellekt (Sİ) alətləri iş qurma prosesini xeyli asanlaşdırıb: “Bir nəfərin süni intellektin köməyi ilə bir neçə nəfərin işini görməsi mümkündür. Bununla ideyasını inkişaf etdirə və biznesə çevirə bilir. Bu, hazırda dünyada çox məşhurdur. Bir şəxs ideyasını həyata keçirmək istəyirsə, o, ideyasına professional mütəxəssis rəyi ala, ilkin təqdimat faylını hazırlaya, ilkin dizaynını, ilkin mobil tətbiq versiyasını və veb-saytını hazırlada bilir. İlkin marketinq strategiyası yaradır və başlayır. Biznesə başlanılacaq bütün ilkin addımları süni intellekt alətlərinin köməyi ilə bir nəfər həyata keçirə bildiyi üçün indiki dövrdə bu cür bizneslərə başlamaq daha rahatdır”.

“Qəbul etməliyik ki, bu rahatlıq sayəsində daha çox insan eyni mövzuda, eyni xidmət sahəsində məhsullar çıxara bilir. Yəni, rəqabət də sürətli şəkildə artır. Deyə bilərik ki, indi məhsul çıxarmaq asandır, amma onu real biznesə çevirmək, gəlir əldə ilə etmək faiz etibarilə daha çətindir. Burada ən mühüm faktor bu işi görən şəxslərin təcrübələri, bacarıqları, netvörkinqi, işə sərf etdikləri vaxt və bu işi sevməsidir” – deyə O.Rzayev qeyd etdi.

Nuranə Mübariz