“Anthropic” 65 milyard dollar cəlb etdi, 1 trilyon dollarlıq şirkətə çevrildi

“Anthropic” son maliyyələşdirmə raundunda 965 milyard dollarlıq post-money qiymətləndirmə ilə 65 milyard dollar vəsait cəlb edib. Bu, süni intellekt startapının birja bazarlarına çıxmazdan əvvəl son özəl maliyyələşdirməsi ola bilər.

Valyuta.az-ın verdiyi xəbərə görə, Series H raunduna “Altimeter Capital”, “Dragoneer”, “Greenoaks”, “Sequoia Capital”, “Capital Group”, “Coatue”, “D1 Capital Partners” və digər investorlar birgə rəhbərlik ediblər. Raundda “Baillie Gifford”, “Blackstone”, “Brookfield”, “D.E. Shaw Ventures”, “DST Global” və “Fidelity Management & Research” daxil olmaqla institusional investorlar iştirak ediblər.

“Samsung”, “SK Hynix” və “Micron” kimi strateji infrastruktur tərəfdaşları da raunda qoşulublar. Raundun 15 milyard dollarlıq hissəsi hiperskeylerlər tərəfindən əvvəlcədən öhdəlik götürülmüş investisiyalardan ibarətdir. Buraya “Amazon”un aprel ayında elan etdiyi 5 milyard dollar da daxildir.

“TechCrunch” ötən ay “Anthropic”in 50 milyard dollarlıq raundu bağlamağa yaxın olduğunu və investorların şirkətin səhmdarları sırasına daxil olmaqda ciddi maraqlı olduğunu yazmışdı. Hətta bir institusional investor “Anthropic”in maliyyə direktoru Krişna Rao (Krishna Rao) ilə görüş əldə etmək üçün 5 milyard dollara qədər vəsait ayırmağa hazır olduğunu bildirmişdi.

“Anthropic” yeni vəsaitdən təhlükəsizlik və izaholunma tədqiqatlarını inkişaf etdirmək, “Claude”a artan tələbatı qarşılamaq üçün hesablama gücünü genişləndirmək, müştərilərin etibar etdiyi məhsul və tərəfdaşlıqları miqyaslandırmaq məqsədilə istifadə etməyi planlaşdırır.

Raund “Anthropic”in yeni “Claude Opus 4.8” modelini təqdim etdiyi günə təsadüf edib. Model agent tipli tapşırıqlarda və qabaqcıl kodlaşdırmada daha güclü imkanları, həmçinin dürüstlük və özünü düzəltməyə yönəlməsi ilə seçilir. Süni intellekt startapının potensial təhlükəsizlik narahatlıqları səbəbindən indiyədək məhdud şəkildə təqdim etdiyi güclü kibertəhlükəsizlik modeli “Mythos” səviyyəsində olan modelləri daha geniş istifadəyə verməyi planlaşdırdığı da bildirilir.

Şirkət son maliyyələşdirmə raundundan bəri, xüsusilə “Claude Code”dan istifadə edən korporativ müştərilər arasında daha sürətli artım nümayiş etdirib. Şirkətin məlumatına görə, onun illikləşdirilmiş gəlir göstəricisi bu ayın əvvəlində 47 milyard dolları keçib. “The Wall Street Journal” isə bu yaxınlarda startapın gəlirlərində 130 faizlik artım gözlədiyini və bunun şirkəti ilk əməliyyat mənfəətinə çıxaracağını yazıb.

“Claude”un son yenilikləri dünyanın ən tələbkar təşkilatları arasında genişmiqyaslı tətbiqi sürətləndirib. Bu dinamika “Anthropic”i süni intellekt innovasiyasının növbəti mərhələsində lider mövqeyə çıxarır və qarşıdakı böyük imkanlardan yararlanmağa şərait yaradır”, – “Altimeter Capital”ın təsisçisi və baş direktoru Bred Gerstner (Brad Gerstner) bildirib.

“Anthropic” və “OpenAI” müvafiq IPO-ları ərəfəsində maliyyələşdirmə və istifadəçi artımı uğrunda gərgin rəqabət aparır. “OpenAI” sonuncu dəfə mart ayında 852 milyard dollarlıq post-money qiymətləndirmə ilə 122 milyard dollarlıq iri raund cəlb edib.

İlon Maskın (Elon Musk) bu ilin əvvəlində “xAI” ilə birləşən “SpaceX” şirkəti isə gözlənilən IPO-da 2 trilyon dollarlıq qiymətləndirməni hədəfləyir və 75 milyard dollardan çox vəsait cəlb etməyə çalışır.