Avropadan Asiyaya: Bu yay daha çox turistin görmək istədiyi inanılmaz yerlər

Dünyanın bəzi məşhur turizm istiqamətləri kütləvi turist axınının qarşısını almağa çalışdığı halda, digərləri əksinə, daha çox qonaq qəbul etmək istəyir.

Valyuta.az xəbər verir ki, “Travel Off Path” səyahət nəşri bu il turistləri böyük məmnuniyyətlə qəbul etməyə hazır olan yeddi möhtəşəm məkanı təqdim edib.

Riqa, Latviya

Baltikyanı regionun “Parisi” adlandırılan bu gözəl art-nuvo şəhəri hələ də turistlər tərəfindən tam kəşf olunmağı gözləyir. Bununla yanaşı, şəhər Estoniya və Litva kimi qonşu ölkələrə rahat çıxış imkanı da təqdim edir.

Kipr

Aralıq dənizində yerləşən bu günəşli ada Avropanın istirahət məkanı kimi təqdim olunsa da, coğrafi baxımdan həmişə Avropa ilə Yaxın Şərq arasında yerləşən bir keçid nöqtəsi hesab olunub. Hazırda Yaxın Şərqlə bağlı narahatlıqlar turistləri tərəddüd etdirdiyi üçün Kipr onların təhlükəsiz olduğuna inandırmağa çalışır.

Gernsi

La-Manş boğazında, Normandiya yaxınlığında yerləşən və çox az tanınan bu ada tez-tez Böyük Britaniya ilə əlaqələndirilsə də, əslində ölkənin tərkib hissəsi deyil — özünüidarə edən taxt-tac asılı ərazisidir. Burada orta əsr qalaları, sakit çimərliklər, qayalıqlar boyunca uzanan cığırlar və nağılvari liman şəhərləri turistləri cəlb etsə də, adaya səfər üçün ayrıca icazə almaq tələb olunur.

Dallas, ABŞ

Texas ştatındakı bu şəhər daha çox dünyanın ən işlək hava limanlarından biri ilə tanınır. Lakin Dallas turistlərin onu yalnız tranzit məntəqəsi kimi deyil, ayrıca səyahət istiqaməti kimi görməsini istəyir. Dünya səviyyəli mağazalar, saysız-hesabsız restoranlar, lüks hotellər və cazibədar ətraf rayonlar bu şəhərin əsas üstünlükləri sırasındadır.

Trinidad və Tobaqo

Karib dənizində yerləşən bu tropik ada dövləti hələ inkişaf mərhələsindədir və turistləri cəlb etmək üçün fəal tanıtım aparır. Təhlükəsizliklə bağlı müəyyən problemlər qalmasına baxmayaraq, azsaylı turistlər, mənzərəli çimərliklər, təsirli şəlalələr və rəngarəng mədəniyyət buranı cəlbedici edir.

Paraqvay

Cənubi Amerikanın materik hissəsində yerləşən ölkələr tez-tez turistlərin diqqətindən kənarda qalır və Paraqvay artıq rəqəmsal köçərilər arasında populyarlıq qazansa da, daha böyük turist axınına ümid edir. Ölkənin turizm idarəsi beynəlxalq tanıtım kampaniyaları həyata keçirir. Burada az tanınan şəhərlərdə çay sahillərində yerləşən gözəl qızılı çimərliklər var və təhlükəsizlik səviyyəsi regionun bir çox ölkəsi ilə müqayisədə daha yüksəkdir.

Şərqi Timor

Cənub-Şərqi Asiyada yerləşən bu kiçik dövlət turistlərlə dolu İndoneziyanın Bali adasına rəqib olmaq istəyir. Şərqi Timor səyahətçilərə vaxtilə Balidə axtardıqları vəhşi və demək olar toxunulmamış çimərlikləri, yaşıl dağları, zəngin mədəniyyəti və ilk kəşf hissini təqdim edir. Burada Baliyə xas olan səs-küylü çimərlik klubları, influencer izdihamı və monotonluq yoxdur.

Paşa Məmmədli