Bakılı gənc necə beynəlxalq şirkətlərin UX-konsultantı oldu?

Bakıdan olan UX-dizayner və sahibkar, “Emotix” şirkətinin qurucusu Akşin Rəcəbov 15 ildən artıqdır user experience və dizayn sahəsində fəaliyyət göstərir.

Valyuta.az "TheTech" ə istinadən xəbər verir ki, hazırda Tallində yaşayan Rəcəbov Azərbaycanın ilk UX-konsultantlarından biri hesab olunur.

O, Polşada psixologiya və dizayn üzrə bakalavr, İstanbulda isə kino və kinematoqrafiya üzrə magistr təhsili alıb. Onun sözlərinə görə, psixologiya, kino və UX-dizayn insanın informasiyanı qəbul etməsi və qərar verməsi prinsipləri ilə bir-birinə bağlıdır.

Akşin Rəcəbov IT sahəsinə təsadüfi şəkildə gəldiyini deyib. UX-ə marağı isə Polşada istifadəçi baxımından uğursuz hazırlanmış yemək sifarişi saytından sonra yaranıb. Daha sonra o, “Electronic Arts” və “Deutsche Bank” şirkətlərində çalışaraq həm oyun sənayesində, həm də korporativ məhsullarda təcrübə qazanıb.

İlk peşəkar işini 17 yaşında Polşadakı kreativ studiyada junior designer kimi əldə edən Rəcəbov bildirir ki, həmin dövrdə əsas öyrənmə üsulu praktika və müşahidə olub. Onun fikrincə, dizayn vizual görünüşdən daha çox problemin həllidir.

Karyerasının əvvəlində əsas çətinliklər dil baryeri, təcrübəsizlik və özünəinam problemi olub. O, xüsusilə rədd cavablarının və cavabsız müraciətlərin motivasiyaya mənfi təsir etdiyini qeyd edib. Sonradan isə bunları şəxsi uğursuzluq deyil, inkişaf üçün geribildirim kimi qəbul etməyə başladığını deyib.

Hazırda Akşin Rəcəbov öz şirkəti və təhsil platforması üzərində çalışır. O, startaplara məhsul hazırlamazdan əvvəl ideyaları yoxlamaqda kömək etdiklərini bildirib.

Gənclərə tövsiyə olaraq isə portfolio yaratmağın, şəxsi layihələr üzərində işləməyin və peşəkar əlaqələr qurmağın vacibliyini vurğulayıb. Onun sözlərinə görə, IT sahəsində əsas amil diplom deyil, bacarıq və düşüncə tərzidir.

Mayya Hüseynova