Dairəvi şarj dövrünün sonu: Avropa USB-C olmayan noutbukların satışını qadağan etdi

Avropa İttifaqında 2026-cı il 28 aprel tarixindən etibarən yeni qayda rəsmi olaraq qüvvəyə minib: satışa çıxarılan bütün yeni noutbuklar USB-C vasitəsilə şarjı dəstəkləməlidir. 

Valyuta.az xəbər verir ki, bu barədə "GSMArena" məlumat yayıb.

Bu qərar Aİ-nin “vahid şarj cihazı standartı” direktivinin son mərhələsidir. Daha əvvəl bu qayda smartfonlar, planşetlər və digər elektron cihazlara şamil edilmişdi, indi isə noutbukları da əhatə edir.

Qaydaya əsasən, istehsalçılar USB-C şarj dəstəyi olmadan noutbuklarını Avropa bazarında rəsmi şəkildə sata bilməyəcəklər. Bununla belə, əlavə portların istifadəsi qadağan edilmir — əsas şərt cihazın USB-C ilə də şarj oluna bilməsidir.

Bəzi istisnalar da mövcuddur. 100 vattdan çox enerji sərf edən oyun və yüksək güclü noutbuklar əvvəlki kimi ənənəvi dairəvi DC şarj girişlərindən istifadə edə biləcək.

Bu təşəbbüsün əsas məqsədi elektron tullantıların (e-waste) azaldılması və istifadəçilər üçün vahid standartın yaradılmasıdır. Aİ hesablamalarına görə, bu dəyişiklik hər il təxminən 11 min ton elektron tullantının azalmasına və istehlakçılara yüz milyonlarla avro qənaət etməyə imkan verəcək.

Bundan əlavə, istehsalçılar cihazları həm şarj cihazı ilə, həm də şarj cihazı olmadan təklif etməli olacaqlar. Bu da artıq alışların və tullantıların azalmasına yönəlib.

Gələcək planlara əsasən, Aİ çıxarıla bilməyən batareyalı noutbukların da qadağan olunmasını nəzərdən keçirir. Bu qaydanın 2027-ci ilin fevralında smartfonlar üçün də qüvvəyə minəcəyi bildirilir.

Eyni zamanda, Avropa İttifaqı “Apple” şirkətinin iOS sistemini daha açıq etməsini tələb edir. Əgər şirkət tələblərə əməl etməzsə, illik gəlirinin 10%-nə qədər cərimə ilə üzləşə bilər.

Paşa Məmmədli