“Google”un ana şirkəti 109,9 milyard dollar gəlir əldə edib

“Alphabet” 2026-cı ilin birinci rübünə dair maliyyə nəticələrini açıqlayıb.

Valyuta.az xəbər verir ki, yanvar-mart aylarını əhatə edən hesabat dövründə şirkətin gəliri 109,9 milyard dollara yüksələrək 2025-ci ilin eyni dövründə qeydə alınmış 90,2 milyard dollarla müqayisədə 22% artıb.

Hesabat dövründə əməliyyat gəliri 39,69 milyard dollar, xalis mənfəət isə 62,58 milyard dollar təşkil edib. Müqayisə üçün qeyd edək ki, bir il əvvəl şirkətin xalis mənfəəti 34,54 milyard dollar olub. “Alphabet” əvvəlki rübdə 113,8 milyard dollar gəlir və 34,45 milyard dollar xalis mənfəət açıqlamışdı.

Səhm başına mənfəət 5,11 dollar olub. “Google Cloud” 20,02 milyard dollar, “YouTube” reklamları isə 9,88 milyard dollar gəlir əldə edib. “Google Cloud”un gəliri illik müqayisədə 63% artaraq bazar gözləntilərini üstələyib. “YouTube” reklamları isə bir il əvvəl 8,93 milyard dollar gəlir gətirmişdi.

Şirkətin baş əməliyyat direktoru Filip Şindler bildirib ki, “YouTube” abunəlikləri artıq reklam gəlirlərindən daha sürətlə artır. Şirkət illik müqayisədə 20% böyümə qeydə alaraq 2022-ci ildən bəri ən yüksək rüblük artım tempinə nail olub.

Baş icraçı direktor Sundar Piçai analitiklərlə keçirilən görüşdə qeyd edib ki, şirkətin korporativ süni intellekt həlləri ilk dəfə olaraq bulud seqmentində əsas artım hərəkətverici qüvvəyə çevrilib. O, həmçinin “Gemini Enterprise” platformasının ödənişli aylıq aktiv istifadəçi sayının əvvəlki rüblə müqayisədə 40% artdığını vurğulayıb.

“Alphabet” bildirib ki, artım əsasən korporativ süni intellekt həlləri və bu sahəyə yönəlmiş infrastrukturun genişləndirilməsi hesabına “Google Cloud Platform” üzərindən təmin olunub. Şirkətin açıqlamasına görə, “Google Cloud”un biznes həcmi 460 milyard dollar təşkil edir.

Axtarış xidməti süni intellekt funksiyalarının istifadəsinin artması fonunda güclü rüb keçirib. Sorğu sayı tarixi maksimuma çatıb, gəlir isə 19 faiz artıb. Bundan əlavə, “Google”un reklam gəlirləri ötən ilin eyni dövrü ilə müqayisədə 15,5%artaraq 77,25 milyard dollar olub.

“Alphabet”in otonom nəqliyyat şirkəti “Waymo”nu da əhatə edən “Digər investisiyalar” bölməsi əvvəlki ilin eyni rübündəki 450 milyon dollarla müqayisədə azalaraq 411 milyon dollar gəlir əldə edib. Şirkət bildirib ki, “Waymo” bu rübdə həftəlik 500 mindən çox tam avtonom səfər həyata keçirib.

Avadanlıq, “Play Store” və reklamdan kənar “YouTube” gəlirlərini əhatə edən “Google”un abunəliklər, platformalar və cihazlar bölməsi isə əvvəlki ilin eyni rübündəki 10,38 milyard dollarla müqayisədə 12,38 milyard dollar gəlir əldə edib.

Mayya Hüseynova