"Meta" "Facebook" və "Instagram" yaradıcılarına kripto ilə ödəniş edəcək

Texnologiya şirkəti "Meta" kripto ödənişlər sahəsində yeni addım atıb.

Valyuta.az xəbər verir ki, şirkət "Facebook" və "Instagram" platformalarında fəaliyyət göstərən kontent yaradıcılarına ödənişləri kripto valyuta ilə almaq imkanı təqdim etməyə başlayıb. Hazırda bu funksiya test mərhələsindədir və Kolumbiya ilə Filippində seçilmiş istifadəçilər üzərində sınaqdan keçirilir.

Məlumata görə, ödənişlər ilkin mərhələdə "Circle" şirkətinin stabilkoini olan "USDC" ilə həyata keçirilir və "Solana" ilə "Polygon" şəbəkələri üzərindən göndərilir. Vəsaitlər birbaşa kontent yaradıcılarının kripto cüzdanlarına köçürülür, sistemin texniki infrastrukturu isə Stripe tərəfindən təmin olunur.

Qeyd edək ki, "Meta" daha əvvəl də "Libra" və "Diem" kimi kripto layihələr üzərində işləsə də, bu təşəbbüslər maliyyə sektoru tərəfindən qarşılanmadığı üçün reallaşmamışdı.

Sərvanə Rəmixanova