Ənənəvi iş saatları dəyişir: Çevik mikroşiftinq trendi yayılır

Əmək bazarında yeni bir trend sürətlə yayılır: mikroşiftinq. Bu model xüsusilə 18–28 yaş aralığında olan Z nəsli arasında populyarlıq qazanır və ənənəvi 9–17 iş qrafikini tədricən arxa plana keçirir.

Valyuta.az xəbər verir ki, mikroşiftinq iş gününün sabit saatlara deyil, gün ərzində bölünmüş kiçik zaman bloklarına ayrılması prinsipinə əsaslanır. Bu bloklar arasında şəxsi işlərə, istirahətə və ya digər fəaliyyətlərə vaxt ayrılır. Model əsasən uzaqdan işləyən və ya çevik qrafikə malik işçilər üçün tətbiq olunur və işəgötürənlə razılaşdırılır.

İş adamları və HR mütəxəssisləri bildirir ki, bu yanaşma məhsuldarlığı azaltmaq əvəzinə artıra bilər, çünki işçi öz ritminə uyğun işləyir.

“İşçilər öz qrafiklərini özləri qururlar”

Bəzi işəgötürənlərin sözlərinə görə, əməkdaşlar gün ərzində fərqli ehtiyaclarına uyğun olaraq iş vaxtını bölürlər: bəziləri səhər idman edir, bəziləri terapiya və ya şəxsi görüşlərə gedir, daha sonra işlərinə davam edirlər. Bəzi işçilər işə günün daha gec saatlarında, məsələn 11:00-dan sonra başlayır.

Bir əməkdaş bu yanaşmanı belə izah edir: o, gün ərzində tapşırıqlarını özü planlaşdırır və iş saatlarını sərt qrafikə bağlı olmadan idarə edir. Onun fikrincə, bu sistem daha az rutin və daha çox rahatlıq yaradır.

Çevik iş modeli məhsuldarlığı artırır

Mikroşiftinqin əsas üstünlükləri arasında işçi azadlığı, yorğunluğun və “burnout” riskinin azalması göstərilir. Bu modeldə əsas göstərici işdə fiziki iştirak deyil, nəticə və görülən işin keyfiyyətidir.

HR mütəxəssisləri də bu tendensiyanın getdikcə daha geniş yayıldığını təsdiqləyir. Onların fikrincə, işəgötürənlər gənc kadrları cəlb etmək üçün artıq bu tip çevik modellərə daha çox üstünlük verirlər.

Avropada sürətlə yayılır

Araşdırmalara görə, Böyük Britaniya və Fransada işçilərin təxminən 70 faizi mikroşiftinq kimi çevik iş modellərinə müsbət yanaşır. Bu da qlobal əmək bazarında “saat əsaslı işdən nəticə əsaslı işə keçid” tendensiyasını gücləndirir.

Paşa Məmmədli