Mərkəzi Bankın faiz gəlirləri 190 milyon manat azalıb

Mərkəzi Bankın 2025-ci il üzrə maliyyə hesabatına əsasən, faiz gəlirlərində azalma qeydə alınıb.

Valyuta.az xəbər verir ki, effektiv faiz dərəcəsi metodu ilə hesablanmış faiz gəlirləri 2024-cü ildəki 546 milyon 137 min manatdan 2025-ci ildə 356 milyon 27 min manata enib.

Beləliklə, Mərkəzi Bankın bu istiqamət üzrə gəlirləri bir il ərzində 190 milyon 110 min manat və ya 34,8% azalıb.

Azalma əsasən ədalətli dəyərinin dəyişməsi sair məcmu gəlirə aid olunan qiymətli kağızlardan əldə edilən gəlirlərində olub. Belə ki, bu istiqamət üzrə gəlirlər 279 milyon 697 min manatdan 105 milyon 211 min manata geriləyib. Bundan əlavə, BVF ilə hesablaşmalar üzrə faiz gəlirləri 8 milyon 229 min manat və ya 17,5%, əks-repo əməliyyatlarından əldə olunan gəlirlər isə 4 milyon 456 min manat və ya 40,1% azalıb.

Eyni zamanda, Mərkəzi Bankın faiz xərclərində də azalma müşahidə olunub. Bu istiqamətdə xərclər 5 milyon 495 min manat və ya 1,1% azalıb.

Nəticədə 2024-cü ildəki 498 milyon 750 min manatdan 2025-ci ildə 493 milyon 255 min manata düşüb. 

Mayya Hüseynova