FBI 8 milyard dollardan çox kriptovalyutanı ələ keçirdi

ABŞ Federal Təhqiqatlar Bürosu (FBI) beynəlxalq kripto fırıldaqçılıq şəbəkələrinə qarşı keçirilən əməliyyatlarda 8 milyard dollardan çox rəqəmsal aktivə əl qoyub.

Valyuta.az xəbər verir ki, əməliyyatlar əsasən kripto investisiya fırıldaqları və onlayn saxtakarlıq şəbəkələrinə qarşı yönəlib. Nəticədə yüzlərlə şübhəli saxlanılıb.

"FBI" 127 min "Bitcoin"in ələ keçirildiyini, aktivlərin böyük hissəsinin Kamboca mərkəzli “Prince Holding Group” və onun rəhbəri Chen Zhi ilə əlaqəli olduğunu bildirib.

Qurum həmçinin əməliyyatlar çərçivəsində insan alveri və məcburi əmək hallarının da aşkarlandığını, təxminən 2 min qurbanın xilas edildiyini açıqlayıb.

Əməliyyatlar Asiya, Afrika və Yaxın Şərqdə bir sıra ölkələri əhatə edib. Dubay, Tayland və Myanmada yüzlərlə nəfər saxlanılıb və geniş infrastruktur ələ keçirilib.

"FBI" bu əməliyyatları “Operation Blackout” çərçivəsində həyata keçirdiyini və kripto fırıldaqlarına qarşı mübarizənin davam edəcəyini bildirib.

Sərvanə Rəmixanova