“Frilans fəaliyyət göstərənlər də CEO vəzifəsinə yüksələ bilər”

Pandemiyadan sonra frilans fəaliyyətə maraq əhəmiyyətli dərəcədə artıb. Bir çox insan ənənəvi 9-dan 6-ya qədər iş rejimindən uzaqlaşaraq daha sərbəst çalışma modelinə üstünlük verir. Bəziləri bu işi gələcəkdə biznes qurmaq üçün başlanğıc hesab etsə də, digərləri üçün əsas məqsəd müstəqil işləməkdir. Lakin zamanla bu şəxslərdə də peşəkar inkişaf və irəliləyiş ehtiyacı yaranır. 

Maraqlıdır, frilans fəaliyyət göstərərək uğurlu karyera qurmaq və müəyyən vəzifələrə yüksəlmək mümkündür?

“HR Hunter” şirkətinin qurucusu, İnsan Resursları üzrə konsultant İlkin Mirzəzadə Valyuta.Az-a açıqlamasında bildirir ki, frilans çalışanların heç də hamısının biznes qurmaq hədəfi olmur: “Frilans çalışan insanların təxminən 10-15%-i öz biznesini qurmağa meyilli olur. Bu da onu göstərir ki, heç də hədəf öz işini qurmaq deyil. Frilans çalışanlar adətən, komandadan daha çox müstəqil işləməyə meyilli olan şəxslərdir. Onlar sakit və sərbəst iş mühitinə üstünlük verir, eyni zamanda səyahət edərək müxtəlif ölkələrdə yaşayarkən gəlir əldə etməyə çalışırlar. Lakin frilans fəaliyyət göstərmək heç də həmin şəxsin bilik və bacarıq səviyyəsinin aşağı olması demək deyil".

Frilanserlərin qazancından danışan İ.Mirzəzadə dedi ki, burada gəlir ölkəyə görə dəyişir: "Bu iş növünün bəzi dövrlərində iş çox, bəzi dövrlərdə az ola bilər. Üstünlüyü odur ki, dünyanın istənilən ölkəsində oturaraq çalışa bilərsiniz. Əksər işlər Amerika və Avropa ilə bağlı olduğu üçün ödəniş avro və dollarla ola bilər. Azərbaycanda yaşayaraq bu cür ödəniş almaq hərtərəfli və maliyyə cəhətdən üstünlükdür. Məsələn, Cənub-Şərqi Asiya ölkələrinin ucuzluğundan yararlana bilərsiniz. Həmçinin, daimi yaşayış məntəqəsi olmadan fəaliyyətinizi davam etdirmək imkanı yaranır".

Ekspertin sözlərinə görə, frilans olaraq çalışanlar da karyeralarında yüksələ bilirlər: “Karyera təkcə korporativ mühitlə məhdudlaşmır. Frilanser səviyyədə işlər götürmək, bu sahə üzrə fəaliyyət göstərmək də fərdi sahibkarlıqdır, karyera qurmağın bir növüdür. Frilans fəaliyyət göstərərək müxtəlif vəzifələrə yüksəlmək mümkündür. Məsələn, proqramlaşdırma, məhsul menecmenti, dizayn, marketinq, hətta CEO səviyyəsinə qədər inkişaf etmək olar”.

Nuranə Mübariz