Hər kəsin 40 yaşlarında yol verdiyi investisiya səhvi

40 yaşa çatdıqda bir çox insan maliyyə baxımından sabit vəziyyətdə olduğunu düşünə bilər. Lakin maliyyə planlaşdırıcıları bildirir ki, məhz bu onillikdə demək olar ki, hər kəsin yol verdiyi və ən zərərli nəticələrə səbəb olan investisiya səhvi ortaya çıxır. Müxtəlif prioritetlərin toqquşması qənaətin təxirə salına biləcəyi hissini yaradır və pis vərdişlər gələcək maliyyə sabitliyini təhlükəyə ata bilər.

Mütəxəssislər insanların 40 yaşlarında etdikləri ən böyük investisiya səhvini (və digər səhvləri) izah edərək, bu səhvlərin təqaüd dövrünü necə poza biləcəyini və bunun qarşısını necə almağın yollarını açıqlayıblar.

Ən böyük səhv: investisiyanı təxirə salmaq

"Silicon Beach Financial" şirkətinin sahibi və sertifikatlı maliyyə planlaşdırıcısı Kristofer Stroup bildirir ki, bir çox insan 40 yaşlarında gəlirinin artacağını, həyatın daha sakitləşəcəyini və ciddi investisiya üçün hələ vaxtlarının olduğunu düşünür. Amma qənaətin az olması və həddindən artıq riskli qərarların verilməsi ən zərərli səhvdir.

“Bu yaşda ipoteka ödənişləri, uşaqların xərcləri və yaşlanan valideynlərə qayğı kimi məsuliyyətlər qənaətin təxirə salına biləcəyi illüziyasını yaradır,” — deyə o qeyd edir.

Bəzən səhv qənaətin düzgün istiqamətdə olmaması ilə bağlı olur. Məsələn, yalnız iş yerindəki səhmlərə yönəlmiş portfellər, qeyri-müntəzəm töhfələr və ya gəliri kifayət qədər artırmayan həddən artıq konservativ investisiyalar bu qəbildəndir.

Nəticədə isə, bu, ciddi maliyyə problemlərinə səbəb ola bilər. “40 yaşda az qənaət etmək gələcəkdə təqaüd üçün töhfələri kəskin şəkildə artırmağı və ya təqaüdü təxirə salmağı tələb edə bilər. Bu zaman faiz gəlirlərinin toplandığı effekt (kompound artım) itirilir və risklər düzgün idarə olunmur.”

Digər tez-tez rast gəlinən səhvlər:

Yaşayış səviyyəsinin yavaş-yavaş artmasına yol vermək - "Concierge Wealth Management" şirkətinin maliyyə planlaşdırıcısı Julian B. Morris deyir ki, bu yaş dövründə insanların əksəriyyəti özlərini daha çox şeyə layiq görür: yeni avtomobil, daha böyük ev, bahalı geyimlər və s. Bu isə, əslində, sərvət qurmaq əvəzinə, yaşayış səviyyəsinin yüksəlməsi ilə sərvətin əriyib getməsinə səbəb olur.

“O insanlar ki, ‘Görünür, yaxşı qazanıram, amma bu pullar hara gedir, bilmirəm’ deyirlər — bax, onlar gəlirlərini izləməyi və qənaətə önəm verməyi öyrənməlidirlər.”

Kompound artım imkanını qaçırmaq:

Morris vurğulayır ki, 40 yaşlar çox vaxt insanın ən yüksək gəlir əldə etdiyi dövrdür, yəni bu dövr “kompound artımın güc dövrü” hesab olunur. Bu vaxt investisiyanı təxirə salmaq niyyəti ilə olsa belə, son nəticədə daha böyük itkilərə səbəb ola bilər. Uşaq xərcləri, valideynlərə qayğı, ipoteka və karyera dəyişiklikləri arasında insanlar özlərinə “Hər şey sakitləşəndə qənaət edərəm” deyirlər. Amma Morris xəbərdarlıq edir: “O sakit dövrü gözləmək, sərvət qurmaq imkanını əldən verməyə səbəb olur.”

40 yaşda düzəlişlər etmək mümkündür

Stroup deyir ki, bu səhvləri düzəltmək tam mümkündür. İlk addım realist pul axını planı hazırlamaqdır. Daha sonra qənaəti avtomatlaşdırmaq, hesabları sadələşdirmək, israfçı xərcləri azaltmaq və müxtəlif investisiya portfeli qurmaq tövsiyə olunur. O, müştərilərinə 40 yaşında illik maaşlarının təxminən 3 qatını, 45 yaşında isə 4-5 qatını qənaətdə saxlamağı tövsiyə edir.

Bununla belə, o vurğulayır:
“Ən təsirli vərdiş — davamlı və avtomatik qənaətin daha yüksək töhfə dərəcəsi ilə həyata keçirilməsidir.”

Riskləri yenidən nəzərdən keçirmək və ağıllı portfel qurmaq:

Stroup bildirir ki, 40 yaşda insanlar hələ də kapital artımı üçün investisiya etməlidirlər, amma risklərin bölüşdürülməsi və diversifikasiya vacibdir. Təkcə iş yerindəki səhmlərə yönəlmək, çox ehtiyatlı portfellər və emosional bazar reaksiyaları investorların inkişafını əngəlləyə bilər. “Fərqli aktiv növlərinə investisiya qoyun, iş yerinə məxsus səhmlərin çoxluğundan çəkinin və uzunmüddətli artım üçün səhmlərə məruz qalmağa davam edin,” — deyə o əlavə edir. “Portfeli mütəmadi olaraq yenidən balanslaşdırmaq və düzəlişlər etmək vacibdir.”

Tənzilə Ağabalayeva