İş elanlarında əməkhaqqı niyə qeyd edilmir?

İş axtaranların ən çox qarşılaşdığı hallardan biri də budur ki, vakansiya, tələblər var, amma əmək haqqı yoxdur. Namizəd müraciət edir, vaxt sərf edir, görüşə gedir və prosesin sonunda ya maaşın gözləntilərdən xeyli aşağı olduğunu öyrənir, ya da əvvəlcədən deyilən məbləğin dəyişdiyini görür. 

Bəs iş elanlarında əməkhaqqı niyə qeyd edilmir?

Əmək qanunvericiliyi üzrə ekspert Nüsrət Xəlilov Valyuta.az-a bildirir ki, bəzi hallarda iş elanlarında əməkhaqqının göstərilməməsi ilə rastlaşmaq mümkündür:

“Diqqət yetirdikdə görünür ki, bu hal daha çox rəhbər vəzifələr üzrə yerləşdirilən vakansiyalarda müşahidə olunur. Adətən mütəxəssis və ya sıravi işçi heyəti üçün nəzərdə tutulan vəzifələrdə isə əməkhaqqı və ya əməkhaqqı aralığı qeyd edilir. Əməkhaqqının göstərilməməsi şirkətin daxili əməkhaqqı siyasəti və ya konfidensiallıq prinsipləri ilə bağlı ola bilər. Çünki bəzi müəssisələrdə bu cür məlumatlar məxfi xarakter daşıyır”.

“Bununla belə, mütəxəssis olaraq tövsiyə edirəm ki, iş elanlarında əməkhaqqının heç olmasa aşağı və yuxarı həddi göstərilsin. Bu yanaşma həm namizədlər, həm də işəgötürənlər üçün daha faydalıdır. Məsələn, əgər bir müəssisə müəyyən vəzifə üçün 1000–1500 manat aralığında əməkhaqqı nəzərdə tutursa, bu məlumatın elanda qeyd edilməsi uyğun namizədlərin müraciət etməsinə kömək edir. Namizəd ilkin mərhələdə əməkhaqqının ona uyğun olub-olmadığını dəyərləndirir, müəssisə isə seçim prosesində daha məqsədli qərarlar verir. Nəticədə həm vaxt itkisi, həm də əlavə resurs sərfiyyatı minimuma endirilmiş olur”- N.Xəlilov qeyd edir.

Tənzilə Ağabalayeva