İşdən ayrılan əməkdaş haqqında obyektiv və müsbət rəy verilməsi vacibdir

İş dünyasında seçim meyarları hər zaman açıq görünənlərlə məhdudlaşmır. Bəzən qərarlar sənədlərdə yazılanlardan daha çox arxa planda formalaşan təsəvvürlərə əsaslanır. Namizədlərin dəyərləndirilməsi zamanı görünməyən, amma təsir gücü olan faktorlar getdikcə daha çox rol oynayır.

Bəs işə qəbulda referanslar da önəmlidirmi?

Rəqəmsal Kadr Agentliyinin İnsan Resursları üzrə meneceri Röyal Əhmədov Valyuta.az-a bildirib ki, hal-hazırda əmək bazarında iş axtaran şəxslərlə şirkətlər arasında formalaşan əmək münasibətlərində müəssisələr namizəd seçimində həm daxili kriteriyalarını, həm də korporativ mədəniyyətlərini nəzərə alırlar:

“İşə qəbul prosesində namizədin bilik və bacarıqları əsas meyarlardan biri hesab olunur. Bununla yanaşı, şirkətlər biznes strategiyalarına uyğun, şəxsi keyfiyyətlərə və iş təcrübəsinə malik namizədlərin axtarışında olurlar. Bu baxımdan əmək bazarında netvörkinqin, yəni peşəkar əlaqələrin formalaşdırılması mühüm əhəmiyyət daşıyır. Bunun əsas səbəblərindən biri şirkətlərin işçi seçimində namizədin əhatə dairəsinin geniş olmasına diqqət yetirməsidir”.

“Şirkətlər işçi seçimi zamanı namizədin əvvəlki iş yerlərindən referans almağa da çalışırlar. Məqsəd namizədin əvvəlki iş proseslərindəki fəaliyyəti, peşəkar bacarıqları və korporativ mədəniyyətə uyğunluğu barədə məlumat əldə etməkdir. Əgər şəxs ilk dəfə əmək münasibətlərinə daxil olursa, işəgötürən onun iştirak etdiyi kurslardan və ya sertifikat aldığı müəssisələrdən referans tələb edə bilər. Əslində, referansın olması namizəd üçün üstünlük hesab olunur, lakin bu, məcburi tələb deyil. Qanunvericiliyə əsasən, işçi əvvəlki iş yerindən ayrılıb başqa bir işə qəbul olunduqda, əvvəlki işəgötürən onun fəaliyyəti barədə obyektiv və müsbət rəy təqdim etməlidir. Lakin əmək münasibətləri ciddi şəkildə pozulduğu hallarda şirkət bu məsuliyyəti öz üzərinə götürməyə bilər. Digər hallarda isə işçinin hüquqlarının pozulmaması məqsədilə onun haqqında obyektiv və müsbət referans verilməsi tövsiyə olunur. Nəticə etibarilə, referansın olması namizəd üçün müsbət üstünlük yaratsa da, bu, hüquqi baxımdan məcburi və təsdiqlənmiş tələb hesab edilmir”- deyə Röyal Əhmədov qeyd edir.

Tənzilə Ağabalayeva