Kriptovalyuta bazarında 290 milyonluq şok: Şimali Koreya yenidən gündəmdədir

Kriptovalyuta bazarları həftəsonu baş verən genişmiqyaslı kiber hücumla silkələnib. 

Valyuta.az xəbər veirr k, istifadəçilərin passiv gəlir əldə etməsinə imkan verən "Kelp DAO" protokolu hakerlərin hədəfinə çevrilib və təxminən 290 milyon dollar dəyərində aktiv oğurlanıb.

Bazar ertəsi etibarilə hücumdan təsirlənən layihələrdən biri olan "LayerZero" bu böyük oğurluğun arxasında Şimali Koreyanın dayandığını iddia edib. Hadisə aprel ayında "Drift" birjasından oğurlanan 285 milyon dollarlıq rekordu da geridə qoyaraq 2026-cı ilin indiyədək ən böyük kripto oğurluğu kimi qeydə alınıb.

"LayerZero" tərəfindən yayılan məlumatlara görə, hücumçular fərqli blokzincirlər arasında əlaqəni təmin edən körpü sistemindəki boşluqdan istifadə ediblər. Hakerlərin "Kelp DAO"nun təhlükəsizlik konfiqurasiyasındakı zəiflikdən faydalandığı bildirilir: çünki sistem əməliyyatlar üçün çoxsaylı təsdiqləmə tələb etmirdi. Bu boşluq saxta əməliyyatlarla vəsaitlərin dəqiqələr içində boşaldılmasına şərait yaradıb.

Şirkət hücumun arxasında Şimali Koreya ilə əlaqəli məşhur “TraderTraitor” qrupunun olduğuna dair güclü dəlillərin mövcud olduğunu bildirir. "Kelp DAO" isə əks mövqe sərgiləyərək hadisədə birbaşa "LayerZero"nu günahlandırıb.

Kim Çen In rejimi ilə əlaqəli kiber qruplar son illərdə rəqəmsal aktiv oğurluğu sahəsində ciddi təcrübə qazanıb. Təkcə ötən il 2 milyard dollardan çox kriptovalyuta oğurladıqları, 2017-ci ildən bu yana isə ümumi zərərin 6 milyard dollara yaxın olduğu təxmin edilir.

Bu son hücum mərkəzləşdirilməmiş maliyyə protokollarında təhlükəsizlik boşluqlarının nə qədər həssas olduğunu və dövlət dəstəkli kiber əməliyyatların miqyasını bir daha ortaya qoyub. Sektor nümayəndələri vəsaitlərin geri qaytarılması üçün işlərin davam etdiyini bildirsə də, oğurlanan məbləğin böyüklüyü bazarlarda narahatlığı artırmaqda davam edir.

Paşa Məmmədli