Kriptovalyuta birjası işçilərinin 14%-ni ixtisar edəcəyini açıqlayıb

Valyuta.az xəbər verir ki, şirkət bazardakı dalğalanmalar və daha səmərəli iş modeli qurmaq məqsədilə təxminən 700 əməkdaşını işdən çıxarmağı planlaşdırır.

"Coinbase" ABŞ Qiymətli Kağızlar və Birja Komissiyasına (SEC) təqdim etdiyi sənəddə ixtisarların şirkətə 50-60 milyon dollar arasında xərc yaradacağını bildirib.

Şirkət təşkilati strukturu sadələşdirərək daha çevik idarəetmə modelinə keçmək niyyətindədir. Yeni strukturda CEO və COO-dan aşağı yalnız beş idarəetmə pilləsinin qalacağı qeyd olunub. Eyni zamanda menecerlərin daha böyük komandaları idarə etməsi planlaşdırılır.

Məlumata görə, şirkət süni intellekt alətlərinin istifadəsini artıraraq daha kiçik komandalarla işləməyə üstünlük verəcək. Bəzi komandaların mühəndislik, dizayn və məhsul inkişafı funksiyalarını birləşdirəcəyi, hətta “tək nəfərlik komanda” modelinin də sınaqdan keçiriləcəyi bildirilir.

"Coinbase"in baş icraçı direktoru Brian Armstrong əməkdaşlara göndərdiyi məktubda süni intellektin iş proseslərini sürətlə dəyişdirdiyini vurğulayıb. Onun sözlərinə görə, mühəndislər artıq həftələrlə vaxt aparan işləri bir neçə günə tamamlaya bilirlər.

Sərvanə Rəmixanova