Bakı ilə Abşeronu birləşdirəcək yeni yol inşa ediləcək - VİDEO

Bakı ilə Abşeronu birləşdirəcək yeni avtomobil yolu inşa olunacaq.

Bu barədə Valyuta.az Azərbaycan Yerüstü Nəqliyyat Agentliyinə istinadən xəbər verir.

Yeni yol Mehdiabad–Baksol–Ziya Bünyadov prospekti istiqamətində salınacaq. Yolun Heydər Əliyev prospektinədək uzadılması nəzərdə tutulur. Gələcəkdə isə onun 8 Noyabr prospekti ilə birləşdirilməsi planlaşdırılır.

Layihənin əsas məqsədi Mehdiabad, Binəqədi və ətraf ərazilərdən Bakının mərkəzinə doğru hərəkəti asanlaşdırmaqdır. Hazırda bu istiqamətdə sürücülər əsasən Binəqədi şosesi, Azadlıq prospekti, Bakı–Sumqayıt şosesi və Ziya Bünyadov prospektindən istifadə edirlər. Bu isə həmin yollarda sıxlıq yaradır.

Yeni yol nəqliyyat axınının daha düzgün paylanmasına imkan verəcək. Xüsusilə Binəqədi–“20 Yanvar”–Ziya Bünyadov prospekti xətti üzrə tıxacların azalacağı gözlənilir.

Layihə çərçivəsində Azadlıq prospekti–Binəqədi şosesi istiqamətindən Binəqədi–Novxanı yoluna birbaşa çıxışın yaradılması da nəzərdə tutulur. Bu, hərəkət vaxtını azaldacaq və marşrutları qısaldacaq.

Bundan başqa, yeni yolun layihəsində gələcək tramvay xətti üçün xüsusi zolaq da nəzərdə tutulub. Bu, ictimai nəqliyyatın inkişafına əlavə imkan yaradacaq.

Yeni yol istifadəyə verildikdən sonra Sumqayıt, Xırdalan, Masazır, Pirşağı, Fatmayı və Mehdiabad istiqamətlərindən hərəkət edən sürücülər şəhərin mərkəzinə daxil olmadan Ziya Bünyadov və Heydər Əliyev prospektləri istiqamətinə çıxa biləcəklər.

Layihə barədə ətraflı videoçarx təqdim olunur: