“Ondo Finance”in CEO-su vəfat edib

Real dünya aktivlərinin tokenizasiyası sahəsində fəaliyyət göstərən və “BlackRock” da daxil olmaqla bir sıra böyük şirkətlərlə əməkdaşlıq edən “Ondo Finance”in qurucusu və baş icraçı direktoru (CEO) Nathan Allman vəfat edib.

Valyuta.az xəbər verir ki, şirkət Allmanın gözlənilmədən həyatını itirdiyini rəsmi açıqlama ilə təsdiqləyib. Hadisə ilə bağlı əlavə detallara yer verilməyib. Nathan Allman 32 yaşında olub.

“Ondo Finance” tərəfindən yayılan açıqlamada bildirilib ki, şirkətin bugünkü mövqeyə gəlməsində Allmanın zəkası və təvazökarlığı mühüm rol oynayıb:

“Onun vəfatını dərin hüznlə elan edirik. Ondo-nu bu nöqtəyə gətirən onun baxışları və liderliyi idi. Başlatdığı işi davam etdirərək onun xatirəsini yaşadacağıq”.

Açıqlamadan sonra kriptovalyuta dünyasının tanınmış simaları və müxtəlif layihələrin rəsmi hesabları sosial şəbəkələrdə başsağlığı mesajları paylaşıblar.

ABŞ-ın nüfuzlu “Ivy League” universitetlərindən olan Brown Universitetinin məzunu Nathan Allman 2019-2021-ci illərdə “Goldman Sachs”ın Rəqəmsal Aktivlər bölməsində çalışıb. O, 2021-ci ildə “Ondo Finance” şirkətini təsis edib.

Şirkətin məlumatına görə, bundan sonra CEO vəzifəsini idarə heyətinin sədri Ian De Bode icra edəcək.

Sərvanə Rəmixanova