Qızılda itkilər bərpa olundu - Nəhəng bankdan rekord proqnoz

İranın Hürmüz boğazını yenidən açması qlobal bazarlarda müharibə qorxusunu optimizm əhval-ruhiyyəsi ilə əvəzləyib. İnvestorların yenidən qızıla yönəlməsi ilə unsiya qiyməti son bir ayın zirvəsinə yüksələrkən, iri banklardan diqqətçəkən yeni proqnozlar gəlib.

Valyuta.az xəbər verir ki, dünyanın ən kritik enerji keçid nöqtələrindən biri olan Hürmüz boğazının yenidən ticarət gəmilərinə açılması qızıl bazarında müsbət ab-hava yaradıb. Müharibənin qlobal iqtisadiyyata vuracağı zərər narahatlığının azalması ilə investorlar yenidən “təhlükəsiz liman” sayılan qızıla yönəlib.

Həftə ərzində yüksəliş trendinə daxil olan spot qızıl təxminən 2 faiz dəyər qazanaraq unsiya başına 4 min 889 dollar səviyyəsinə qədər yüksəlib. 17 martdan bu yana ən yüksək səviyyəni test edən qızıl daha sonra bir qədər geriləyərək həftəni 4 min 830 dollar səviyyəsində başa vurub.

Gümüş bazarında isə artım daha kəskin olub. 5 faizdən çox dəyər qazanan gümüşün unsiyası 83 dollara qədər yüksələrək son beş həftənin zirvəsini görüb. Unsiyada gümüş həftəni 80 dollar səviyyəsində tamamlayıb.

Yaxın Şərqdə gərginliyin başladığı ilkin dövrdə neft qiymətlərində artım və inflyasiya qorxusu qızılı təzyiq altında saxlamışdı. Lakin Hürmüz boğazının açılması ilə neft tədarükü ilə bağlı narahatlıqlar azalaraq bazarı sakitləşdirib. Qızıl, təxminən altı həftə əvvəl başlayan müharibədən sonra yaşadığı itkilərin yarıdan çoxunu bu yüksəlişlə geri alıb.

Müharibənin başlanğıcından bəri güclü dollar və yüksək faiz gözləntiləri səbəbindən təxminən 10 faiz dəyər itirən qızıl üzərindəki təzyiq azalıb. Faiz gəliri olmayan qızılın əsas rəqibi olan yüksək faiz gözləntiləri müharibə riskinin azalması ilə yerini yenidən investisiya marağına verib.

Nəhəng banklardan nəhəng proqnozlar: 8 min dollara qədər yüksələ bilər

Bazarın bu bərpasından sonra iri maliyyə qurumları proqnozlarını yeniləyib:

“Goldman Sachs”: ilin sonu üçün 5 min 400 dollar proqnozunu saxladığını açıqlayıb.

“Wells Fargo”: ABŞ-ın maliyyə nəhəngi tarixdəki böyük çöküşlərdən sonra hər zaman kəskin yüksəlişlərin gəldiyini xatırladaraq, qızılın unsiya qiymətinin 8 min dollara qədər yüksələ biləcəyini bildirib.

Qızıl ilin əvvəlindən bu yana bütün dalğalanmalara baxmayaraq investorlara təxminən 10 faiz qazanc gətirib.

Paşa Məmmədli