Startapını satdı, 400 əməkdaşını milyonçu etdi - SƏHƏR OXUSU

Bəzən şirkət sahibləri elə qərarlar verir ki, bunun təsiri təkcə bizneslə məhdudlaşmır, yüzlərlə insanın həyatına birbaşa təsir edir.

Texnologiya dünyasında belə nümunələr çox deyil. Adətən startap satışı sahibkara böyük qazanc gətirir, amma əməkdaşlar bu prosesdən eyni səviyyədə faydalanmır.

Lakin bu dəfə fərqli olub. Bir sahibkar startapını milyardlarla dollara sataraq yüzlərlə əməkdaşının da milyonçu olmasına şərait yaradıb.

Valyuta.az xəbər verir ki, ABŞ-da fəaliyyət göstərən texnologiya sahibkarı Jyoti Bansal startapını satmaq qərarını əsasən əməkdaşlarını nəzərə alaraq verdiyini açıqlayıb.

O, 2017-ci ildə qurduğu AppDynamics şirkətini 3,7 milyard dollara "Cisco" şirkətinə satıb. Halbuki, həmin vaxt startap bir neçə gün sonra IPO-ya çıxmağa hazırlaşırdı.

Bansal bildirib ki, şirkəti satmaq onun karyerasında “ən çətin qərarlardan biri” olub. Onun sözlərinə görə, IPO və ya satış variantlarından hər ikisi ona şəxsi qazanc gətirəcəkdi, lakin yalnız satış seçimi əməkdaşların da böyük qazanc əldə etməsinə imkan verirdi.

Nəticədə, qərardan sonra şirkətin təxminən 400 əməkdaşı səhmlərinin dəyərinin artması hesabına ən azı 1 milyon dollar qazanc əldə edib. Onlardan bəzilərinin qazancı isə 5 milyon dolları keçib.

“Bu, insanların həyatını dəyişən nəticələrdir”, - deyə Bansal qeyd edib.

O bildirib ki, qərar verərkən yalnız maliyyə deyil, həm də şirkətin gələcəyi, məhsulların uyğunluğu və 1200-ə yaxın əməkdaşın taleyi nəzərə alınıb. Onun hesablamalarına görə, şirkətin eyni dəyərə IPO yolu ilə çatması üçün ən azı 3–4 il vaxt və ciddi risklər tələb olunurdu.

“Bu qərarla biz həmin riskləri əməkdaşlar üçün aradan qaldırdıq”, - deyə o əlavə edib.

Bununla belə, sahibkar sonradan bu qərara görə müəyyən peşmanlıq hiss etdiyini də etiraf edib. Onun sözlərinə görə, şirkəti böyütmək imkanlarının olduğunu düşünürmüş və satışdan sonra bir müddət məqsədsizlik hissi yaşayıb.

Bansal qeyd edib ki, satış qərarı onun özü üçün də böyük maliyyə qazancı gətirib. O, şirkətin 14%-dən çox hissəsinə sahib idi.

“Bu, mənim üçün də həyat dəyişən məbləğ idi. Amma əsas faktor bu deyildi. Ən vacibi əməkdaşlarımız idi”, - deyə o vurğulayıb.

Sərvanə Rəmixanova