“Tesla”nın keçmiş rəhbəri yeni startap yaradıb

“Tesla” şirkətinin keçmiş rəhbərlərindən biri və “Heron Power” şirkətinin baş icraçı direktoru Dryu Baqlino yeni istilik nasosu startapı yaradıb. “TechCrunch”ın yaydığı məlumata görə, “Sadi Thermal Machines” adlı şirkət 2025-ci ilin iyun ayında təsis olunub.

Şirkət Kaliforniyanın Skotts Velli şəhərində yerləşir və Baqlinonun digər startapı olan “Heron Power” ilə eyni qərargahı bölüşür. Mənbələrin bildirdiyinə görə, yeni şirkətdə bir sıra keçmiş “Tesla” əməkdaşları da çalışır.

Valyuta.az xəbər verir ki, “TechCrunch” Delaver və Kaliforniyada qeydiyyata alınmış sənədləri araşdıraraq şirkətin fəaliyyətini təsdiqləyib. “Sadi Thermal Machines” adı isə müasir termodinamikanın əsasını qoyan fransız fiziki Nikola Leonard Sadi Karnoya istinad hesab olunur.

Dryu Baqlino “Tesla”da təxminən 20 il fəaliyyət göstərib. O, şirkətin ilk “Roadster” modelindən “Powerwall” və “Powerpack” enerji saxlama sistemlərinə qədər bir çox layihənin hazırlanmasında iştirak edib. 2024-cü ildə şirkətdən ayrılan Baqlino son olaraq baş vitse-prezident vəzifəsini tuturdu və “Tesla”nın enerji texnologiyalarının inkişafına rəhbərlik edirdi.

Baqlino həmçinin “Tesla”nın istilik idarəetmə sistemləri üzərində çalışan əsas mühəndislərdən biri olub. O, batareya və ötürücü sistemlərin soyudulmasını təmin edən iki dövrəli istilik idarəetmə texnologiyası üzrə patent müəlliflərindən biri kimi qeyd olunur.

Bu texnologiya sonradan “Tesla”nın “Model Y” avtomobilində istifadə edilən “octovalve” sisteminin əsasını təşkil edib. Həmin sistem avtomobilin salonunun, batareyalarının və mühərriklərinin temperaturunu vahid istilik nasosu vasitəsilə idarə edir.

“Tesla” rəhbərliyi daha əvvəl yaşayış və kommersiya obyektləri üçün istilik nasosu hazırlamaq planlarını da müzakirə etmişdi. 2022-ci ildə keçirilən maliyyə hesabatı konfransında Dryu Baqlino və şirkətin baş direktoru İlon Mask bu istiqamətin “Tesla”nın dayanıqlı enerjiyə keçid missiyası ilə uyğun olduğunu bildirmişdilər.

Lakin şirkət indiyədək yaşayış üçün HVAC və ya su qızdırma sistemi təqdim etməyib. Yeni yaradılan “Sadi Thermal Machines” startapının isə Baqlinonun bu sahədəki planlarını reallaşdırmaq məqsədi daşıdığı ehtimal olunur.

Tənzilə Ağabalayeva