“Xalq Həyat Sığorta” maliyyə hesabatını açıqladı

Xalq Həyat Sığorta Şirkəti ASC 2026-cı ilin I rübü üzrə maliyyə göstəricilərini açıqlayıb.

Valyuta.az xəbər verir ki, 2026-cı ilin yanvar-mart aylarında şirkətin gəlirləri illik müqayisədə 478 min 70 manat və ya 11,8% artaraq 4 milyon 532 min 250 manat təşkil edib. 2025-ci ilin eyni dövründə bu göstərici 4 milyon 54 min 181 manat olub.

Hesabat dövründə sığorta şirkətinin əsas əməliyyat gəlirləri illik müqayisədə 384 min 254 manat və ya 15% artaraq 2 milyon 938 min 109 manata yüksəlib. 2025-ci ilin eyni dövründə bu göstərici 2 milyon 553 min 855 manat olub.

Şirkətin xərcləri 96 min 667 manat və ya 2,8% artaraq 3 milyon 559 min 597 manat təşkil edib. Əsas əməliyyat xərcləri 256 min 75 manat və ya 9,7% azalsa da, işlərin aparılması xərcləri 352 min 742 manat və ya 43,5% artıb.

2026-cı ilin ilk rübündə Xalq Həyat Sığorta Şirkəti ASC 972 min 653 manat xalis mənfəət əldə edib. Bu göstərici ötən ilin eyni dövrü ilə müqayisədə 381 min 403 manat və ya 64,5% çoxdur.

"Xalq Həyat"ın cəmi öhdəlikləri illik müqayisədə 1 milyon 532 min 743 manat və ya 13,8% artaraq 12 milyon 670 min 302 manata çatıb. 2025-ci ilin eyni dövründə bu göstərici 11 milyon 137 min 559 manat təşkil edib.

Şirkətin cəmi aktivləri illik müqayisədə 3 milyon 36 min 548 manat və ya 10,7% artaraq 31 milyon 493 min 790 manata yüksəlib. Ötən ilin eyni dövründə bu göstərici 28 milyon 457 min 242 manat olub.

Sərvanə Rəmixanova