20 saatdan çox havada: Dünyanın ən uzun fasiləsiz reysi istifadəyə veriləcək

Əgər siz heç vaxt Londondan Avstraliyaya uçmusunuzsa, bilirsiniz ki, belə uzun məsafəli reyslərdə adətən yanacaq doldurmaq üçün ara eniş tələb olunur. Lakin yaxın gələcəkdə bu ənənə dəyişə bilər, çünki Avstraliyanın “Qantas” aviaşirkəti dünyanın ən uzun fasiləsiz kommersiya uçuşu olacaq reysi sınaqdan keçirməyə hazırlaşır.

Valyuta.az xəbər verir ki, bu barədə “Express” yazır.

Məlumata görə, 2027-ci ildə “Qantas”ın yeni A350-1000ULR təyyarəsi ilə ilk sınaq uçuşu həyata keçiriləcək. Bu reysin əsas məqsədi mümkün olan ən uzun məsafəni fasiləsiz qət etmək olacaq. Təcrübəli sərnişinlər üçün bu, arzusunda olduqları bir səyahət kimi görünə bilər, digərləri isə uçuş zamanı ayaqları uzatmağa imkan verən, fasiləli marşrutlara üstünlük verə bilərlər.

Yeni marşrutların təxminən 22 saat fasiləsiz uçuş müddəti ilə Sidneyi London və Nyu-Yorkla birləşdirməsi planlaşdırılır. Bu isə hazırda dünyanın ən uzun kommersiya reysi sayılan, Nyuark (ABŞ) ilə Sinqapurun Çangi hava limanı arasında 18 saat 30 dəqiqə davam edən uçuş rekordunu geridə qoyacaq.

Bu cür uçuşlar xüsusi modifikasiya edilmiş təyyarə sayəsində mümkün olacaq. Təyyarəyə əlavə olaraq 20 000 litrlik mərkəzi yanacaq çəni quraşdırılıb.

İlk təyyarə hazırda Fransanın Tuluza şəhərindədir. Burada mühərriklərin quraşdırılması və ilk sınaq uçuşundan əvvəl son yer sınaqları aparılır.

Birinci sinif sərnişinlər üçün uzanan oturacaqlar və ayrıca yataq yeri nəzərdə tutulub. “Qantas” bildirir ki, interyer “jetlag” (saat fərqindən yaranan yorğunluq) təsirini azaltmaq və sərnişinlərin rahatlığını artırmaq üçün elmi əsaslı dizaynla hazırlanıb.

Təyyarənin ümumi tutumu 238 yer olacaq. Bu, adətən 300-dən çox sərnişin daşıyan standart uzunməsafəli təyyarələrdən azdır. Boşaldılan sahə sayəsində uzun uçuşlar üçün “sağlamlıq zonası” yaradılıb. Bu zona premium ekonom və ekonom sinif sərnişinləri üçün nəzərdə tutulub.

Yerlərin bölgüsü belədir: 6 yer birinci sinif, 52 biznes sinif, 40 premium ekonom və 140 ekonom sinif.

Yeni ultra uzun məsafəli xidmət “Project Sunrise” – “Günəşin doğuşu layihəsi” adlandırılıb. Bu ad “Qantas”ın tarixi reyslərinə, xüsusilə Qərbi Avstraliya ilə keçmiş Britaniya hərbi bazası arasında həyata keçirilən və sərnişinlərin iki günəş doğuşu gördüyü uçuşlara istinad edir.

Paşa Məmmədli