Restoranların "vaxt limiti" oyunu: Müştərini məcburi sifarişə vadar etmək qanunidirmi?

Bəzi restoranlarda müştərilərə müəyyən vaxtdan sonra yenidən sifariş vermək tələbinin qoyulması son günlər ictimai müzakirələrə səbəb olub. Paytaxtın bəzi iaşə obyektlərində tətbiq edilən bu “qaydanın” nə dərəcədə əsaslı və qanunauyğun olması ciddi suallar doğurur.

Mövzu ilə bağlı Yenicag.az-a açıqlama verən Azərbaycan Hotellər və Restoranlar Assosiasiyasının İdarə Heyətinin sədri Samir Dübəndi bildirib ki, müştəridən hər 1-2 saatdan bir yenidən sifariş tələb etmək peşəkar xidmət modeli hesab oluna bilməz.

Sədrin sözlərinə görə, restoranların, xüsusilə sıx saatlarda masaların dövriyyəsini tənzimləmək hüququ olsa da, bu, etik normalar çərçivəsində həyata keçirilməlidir:

“Bu, qonağa təzyiq göstərmək yolu ilə deyil, şəffaf və nəzakətli qaydalar əsasında edilməlidir. Məsələn, masa üçün vaxt limiti varsa, bu, bron zamanı və ya qonaq əyləşməzdən əvvəl açıq şəkildə izah olunmalıdır. Əks halda, müştəri əyləşdikdən sonra qarşısına yeni şərtlərin qoyulması düzgün yanaşma deyil”.
Ekspert vurğulayıb ki, düzgün qurulmayan kommunikasiya müştəri ilə obyekt arasında gərginliyə səbəb olur:

“Qonaq restorana istirahət etmək üçün gəlir. Ona xidmət göstərmək əvəzinə əlavə psixoloji təzyiq yaratmaq, müəyyən müddətdən sonra sifarişə məcbur etmək xidmət mədəniyyətinə ziddir. Bu yanaşma müştəridə narazılıq formalaşdırır və həmin obyektə təkrar müraciət ehtimalını azaldır”.
Samir Dübəndinin fikrincə, Azərbaycanın qonaqpərvərlik ənənələri və istehlakçı hüquqları baxımından müştəri qarşısında sonradan əlavə öhdəlik yaratmaq yolverilməzdir:

“Əgər qonağa “yenidən sifariş edin, yoxsa masanı boşaldın” kimi münasibət göstərilirsə, bu, həm etik, həm də xidmət mədəniyyəti baxımından ciddi suallar doğurur. Belə üsul qısamüddətli dövrdə dövriyyəni artıra bilər, amma uzunmüddətli perspektivdə müştəri etibarını zəiflədir və müəssisənin nüfuzuna zərbə vurur”.
Sədr əlavə edib ki, dünya praktikasında da əsas prinsip şəffaflıqdır. Bir çox ölkələrdə restoranlar sıxlıq saatlarında vaxt limiti müəyyən etsələr də, bu barədə müştəriyə əvvəlcədən məlumat verilir.

“Restoran biznesində düzgün yol müştərini məcbur etmək deyil, qaydaları dürüst şəkildə elan etməkdir. Əks halda, qısa müddətli qazanc naminə uzunmüddətli müştəri itkisi qaçılmazdır”, – deyə o, fikrini yekunlaşdırıb.