Azərbaycanlı cütlük qarşılaşdıqları problemdən startap qurdu - Biznesin 10 mindən çox istifadəçisi var

“MenzilPark” startapının həmtəsisçiləri Aysel və Ələkbər Heydərov şəxsi yaşayış təcrübələrindən yaranan problemi biznes ideyasına çeviriblər.

“Valyuta.az “TheTech”ə istinadən xəbər verir ki, həmtəsisçilərin bildirdiyinə görə, yaşadıqları yaşayış kompleksində idarəetmə tamamilə ənənəvi üsullarla aparılırdı.

Kommunal ödənişlər yalnız nağd şəkildə və məhdud saatlarda qəbul edilir, məlumatlandırma isə kağız elanlarla həyata keçirilirdi.

Onlar bildiriblər ki, vaxtında ödəniş edə bilmədikləri üçün bir müddət elektrik enerjisinin kəsilməsi ilə də qarşılaşıblar. Sakinlər çox vaxt suyun və digər xidmətlərin dayandırılması ilə bağlı elanları görmədiklərindən əvvəlcədən məlumat ala bilmirdilər.

Aysel Heydərovanın sözlərinə görə, problemlər yalnız sakinlərlə məhdudlaşmırdı. İdarəedici şirkətlər də borcların uçotunu əl ilə aparır, borclu sakinlərin qapılarına elan yapışdırır və əməkdaşlar insanlara bir-bir zəng etməli olurdular. Bu isə sistemin rəqəmsallaşmaya ciddi ehtiyac duyduğunu göstərirdi.

Bundan sonra tərəflər yaşayış komplekslərinin idarə olunmasını rəqəmsallaşdıran platforma yaratmağa qərar veriblər. “MenzilPark” sakinlər üçün onlayn ödəniş, bildiriş və birbaşa əlaqə imkanları təqdim edir. İdarəedici şirkətlər isə bütün əməliyyat proseslərini vahid inzibati panel üzərindən idarə edə bilirlər.

Layihənin inkişafında “ABB Innovation” hakatonu mühüm rol oynayıb. Komanda əvvəlcə yalnız ilk 10 komandanın sırasına düşərək inkubasiya proqramına qəbul olunmağı hədəfləsə də, ideya münsiflər tərəfindən yüksək qiymətləndirilib və startap qalib elan olunub. Bundan sonra layihə inkubasiya mərhələsinə keçib və biznes modeli üzərində işlənilib.

Həmtəsisçilər qeyd ediblər ki, startapın ilk mərhələdə inkişafı şəxsi vəsait hesabına həyata keçirilib. Aysel Heydərova işləməyə davam edib, həyat yoldaşı Ələkbər Heydərov isə əsas işindən ayrılaraq tam şəkildə layihəyə fokuslanıb. Komanda qazandıqları bütün qrant və mükafatları yenidən məhsulun inkişafına yatırıb. 

Müştərilər əsasən “Kimlərlə işləyirsiniz?” və “Hansı uğurlu nümunələriniz var?” kimi suallar verirdilər. Bu səbəbdən ilk müqaviləni əldə etmək onlar üçün ən çətin mərhələ olub.

Bildiriblər ki, ikinci müştərilərini isə təsadüf nəticəsində qazanıblar. İlk istifadəçilərdən biri sistemi bəyənərək onu başqa yaşayış kompleksinə tövsiyə edib və bu, layihənin böyüməsində mühüm rol oynayıb.

Hazırda “MenzilPark” Azərbaycanda onlarla yaşayış kompleksində istifadə olunur və 10 mindən çox aktiv istifadəçiyə malikdir. Şirkət əsasən yüksək xidmət səviyyəsi təqdim edən premium yaşayış kompleksləri ilə əməkdaşlıq edir.

Layihə müxtəlif müsabiqə və proqramlarda da uğur qazanıb. Startap “ABB Hackathon Startup Challenge” müsabiqəsində ikinci yerə layiq görülüb, “KOBIA”dan qrant alıb, “Baku ID Startup Battle 2024” yarışmasının qalibi olub və “MilliNet 2025”də “Business Solution of the Year” seçilib.

Bundan əlavə, “MenzilPark” “EBRD” proqramına da seçilib. Proqram çərçivəsində layihəyə 50 min avroya qədər maliyyə dəstəyi nəzərdə tutulur.

Komanda gələcəkdə platformanı “all-in-one” yaşayış ekosisteminə çevirməyi planlaşdırır. Bildirilib ki, gələcəkdə tətbiq vasitəsilə təmizlik xidməti sifariş etmək, su çatdırılması üçün müraciət göndərmək və digər məişət xidmətlərini idarə etmək mümkün olacaq. Startap beynəlxalq bazarlara çıxış imkanlarını da araşdırır.

Mayya Hüseynova