"Bitcoin" şirkəti "Nasdaq"dan çıxmamaq üçün səhmləri birləşdirir

"Bitcoin" ehtiyatları ilə tanınan "Nakamoto" şirkəti "Nasdaq" birjasında qalmaq üçün səhmlərin tərs bölünməsi qərarı verib.

Valyuta.az xəbər verir ki, şirkət 1-ə 40 nisbətində tərs bölünmə həyata keçirəcək. Bu qərara əsasən, investorların əlində olan hər 40 ədəd "NAKA" səhmi 1 yeni səhmə çevriləcək. Bununla səhmlərin sayı azalsa da, qiyməti nəzəri olaraq 40 dəfə artacaq. Şirkətin ümumi bazar dəyərində isə dəyişiklik olmayacaq.

Qeyd edək ki, "Nasdaq" birjasında listinqdə qalmaq üçün şirkətlərin səhmləri müəyyən müddət ərzində ən azı 1 dollar səviyyəsində ticarət olunmalıdır. Uzun müddətdir bu həddin altında qalan "Nakamoto" şirkəti birjadan “delist” olunma təhlükəsi ilə üz-üzə qalmışdı.

"NAKA" kodu ilə ticarət olunan səhmlər ötən ilin may ayında IPO-dan sonra bir müddət 25 dolları keçsə də, daha sonra kəskin ucuzlaşıb. Son həftələrdə isə səhmin qiyməti 0,20 dolların da altına düşüb.

Şirkətin açıqlamasına görə, dövriyyədə olan səhmlərin sayı 696 milyondan 17,4 milyona enəcək. Buna baxmayaraq, birjadakı “NAKA” kodu dəyişməyəcək. Tərs bölünmə prosesi 22 may tarixindən etibarən qüvvəyə minəcək.

Devid Beylinin rəhbərlik etdiyi şirkətin balansında 5700-dən çox "Bitcoin" mövcuddur.

Sərvanə Rəmixanova