"Bitcoin"də iki qüvvə toqquşur - 4 həftəlik ralli davam edəcəkmi?

Kriptovalyuta bazarının lider aktivi olan "Bitcoin" son günlərdə dalğalı hərəkət etsə də, həftəlik əsasda yüksəliş trendini qorumaqda davam edir. Bununla yanaşı, qlobal hadisələr qiymət dinamikasında həlledici rol oynamağa davam edir.

Valyuta.az xəbər verir ki, həftə ərzində 79 min dollar səviyyəsini test edən "Bitcoin" son əməliyyatlarda 0,3 faiz azalaraq 77.602 dollar səviyyəsinə enib. Buna baxmayaraq, aktiv həftəlik əsasda təxminən 4 faiz dəyər qazanaraq ardıcıl dördüncü həftəni yüksəlişlə başa vurmaq potensialını saxlayır.

ETF axınları yüksəlişi dəstəkləyir

ABŞ-da spot "Bitcoin" ETF-lərinə güclü tələbat qiymətləri dəstəkləyən əsas amil kimi ön plana çıxır. Son bir həftədə təxminən 1 milyard dollar həcmində xalis daxilolma qeydə alınıb. Ümumi daxilolmaların 58 milyard dolları keçməsi institusional investor marağının davam etdiyini göstərir.

Geosiyasi risklər və neft qiymətləri təzyiq yaradır

Yaxın Şərqdə artan gərginlik və Hörmüz boğazı ətrafında risklər neft qiymətlərini yüksəldir və qlobal inflyasiya gözləntilərini artırır. Brent markalı neftin 106 dollar səviyyəsini aşması risk iştahını məhdudlaşdıraraq kriptovalyutalardakı yüksəliş tempini zəiflədir.

Altkoinlərdə qarışıq mənzərə

Altkoin bazarında fərqli istiqamətli hərəkətlər müşahidə olunur. "Ethereum" ucuzlaşarkən, XRP məhdud artım göstərib. "Solana" dəyər itirib, "Cardano" və "Polygon" isə müsbət dinamika ilə seçilib. "Dogecoin" də bahalaşan aktivlər sırasında yer alıb.

Bazarda istiqamət axtarışı davam edir

Analitiklər bildirirlər ki, güclü ETF axınlarına baxmayaraq, geosiyasi risklər və makroiqtisadi qeyri-müəyyənlik bazarda istiqamət axtarışını gücləndirir. "Bitcoin"in 4 həftəlik yüksəliş seriyasını davam etdirib-etdirməyəcəyi qlobal risk iştahı və kapital axınlarının dinamikasından asılı olacaq.

Paşa Məmmədli