Dünyanın ən yaxşı pivələri seçildi - 50 ölkədən 8 mindən çox pivə yarışdı

Pivə sənayesinin ən nüfuzlu beynəlxalq müsabiqələrindən biri sayılan "2026 World Beer Cup"ın qalibləri açıqlanıb.

Valyuta.az xəbər verir ki, “Pivə Olimpiadası” kimi tanınan yarışmada bu il 50 ölkədən istehsalçılar iştirak edib. 

Müsabiqə çərçivəsində 1 644 pivə zavodundan təqdim olunan 8 166 pivə nümunəsi 113 pivə və 5 sidr kateqoriyası üzrə qiymətləndirilib. Ümumilikdə 186 üslub üzrə medalçılar müəyyənləşdirilib. Münsiflər heyətində isə 37 ölkədən 255 ekspert yer alıb. 

Bazarda hansı pivələr önə çıxır?

Məlumata görə, bu il ən çox iştirakçı cəlb edən kateqoriya "West Coast-Style India Pale Ale" (IPA) olub. Bu kateqoriyada 293 nümunə yarışıb. Bunun ardınca "Juicy or Hazy IPA" kateqoriyası gəlib. Ekspertlər bunu istehlakçı zövqündə dəyişiklik və daha klassik, acı dada malik IPA növlərinə dönüş kimi qiymətləndirirlər. 

Eyni zamanda lager növlərinə marağın artdığı da qeyd olunur. Xüsusilə Alman və Çex üslublu lager kateqoriyalarında iştirak sayının yüksək olması bazardakı yeni tendensiyaları göstərir. 

Ən yaxşı pivələr hansılar oldu?

Bəzi əsas kateqoriyalar üzrə qaliblər belədir:

Ən yaxşı meyvəli pivə: Yuzu Lager – ABŞ

Ən yaxşı alkoqolsuz pivə: Non-Alcohol Weissbier – Çin

Ən yaxşı klassik IPA: Immutable Dawn – ABŞ

Ən yaxşı West Coast IPA: Project Alpha 81 – ABŞ

Ən yaxşı Alman üslublu pilsner: 801 Pilsner – ABŞ

Ən yaxşı sidr: Classic Dry – ABŞ

Sərvanə Rəmixanova