Faiz gəlirləri 71% artan AFB Bank nələrdən qazanc əldə edib?

AFB Bank 2026-cı ilin I rübündə faiz gəlirlərini ötən ilin eyni dövrü ilə müqayisədə 71 faiz artıraraq 11 milyon 53,6 min manata çatdırıb.

Valyuta.az xəbər verir ki, bank 2025-ci ilin I rübündə isə 5 milyon 724,9 min manat faiz gəliri əldə etmişdi.

Maliyyə hesabatına görə, faiz gəlirlərinin əsas hissəsi müştərilərə verilmiş kreditlərdən formalaşıb. Bankın kreditlər üzrə faiz gəlirləri illik müqayisədə 4 milyon 851,5 min manatdan 9 milyon 738,3 min manata yüksəlib. 

AFB Bank banklar və digər maliyyə institutlarındakı depozitlər üzrə də gəlirlərini artırıb. Belə ki, bu sahədən əldə olunan faiz gəlirləri 2025-ci ilin ilk rübündəki 377,7 min manatdan 2026-cı ilin eyni dövründə 842 min manata çatıb.

Bununla yanaşı, banklar və digər maliyyə institutlarına verilən kreditlər üzrə faiz gəlirləri 232,1 min manat təşkil edib. Ötən ilin müvafiq dövründə bu istiqamətdə gəlir qeydə alınmamışdı.

Digər faiz gəlirləri də 134,9 min manatdan 209,4 min manata yüksəlib.

Ticarət və investisiya qiymətli kağızları isə 2025-ci ilin ilk rübündəki 360,7 min manatdan 2026-cı ilin eyni dövründə 31,8 min manata enib.

Mayya Hüseynova