İrandakı müharibə neft nəhənglərini zənginləşdirdi - Saatda 30 milyon dollar

İran ətrafında davam edən müharibə qlobal neft və qaz nəhənglərinin gəlirlərini əhəmiyyətli dərəcədə artırıb. 

Valyuta.az xəbər verir ki, “The Guardian” nəşrinin “Rystad Energy” konsaltinq şirkətinin məlumatlarına əsaslanan təhlilinə görə, münaqişənin ilk ayında ən böyük enerji şirkətləri hər saat 30 milyon dollardan çox gəlir əldə edib.

Bildirilir ki, əsas qazananlar sırasında Səudiyyə Ərəbistanının dövlət şirkəti “Saudi Aramco”, Rusiyanın “Gazprom”, “Rosneft” və “Lukoil”, eləcə də ABŞ-ın “Exxon Mobil” şirkəti yer alır.

Təhlilə əsasən, “Saudi Aramco” 2026-cı ilin nəticələrinə görə neftin orta qiyməti 100 dollar səviyyəsində qalarsa, əlavə 25,5 milyard dollar gəlir əldə edə bilər. Rusiya enerji şirkətlərinin isə eyni şərtlər altında ümumilikdə 23,9 milyard dollar əlavə qazanc əldə edəcəyi proqnozlaşdırılır.

Məlumata görə, müharibə Rusiyanın Ukraynaya qarşı davam edən hərbi əməliyyatları üçün əlavə maliyyə axını yaradıb. Enerji və Təmiz Hava Araşdırmaları Mərkəzinin analizinə əsasən, mart ayında Rusiyanın gündəlik neft ixrac gəlirləri 840 milyon dollara yüksəlib ki, bu da fevral ayı ilə müqayisədə 50 faiz artım deməkdir.

“Exxon Mobil”in 11 milyard dollar, Britaniyanın “Shell” şirkətinin isə 6,8 milyard dollar əlavə gəlir əldə edə biləcəyi qeyd olunur.

Eyni zamanda Avropa İttifaqında fövqəlmənfəət vergisi tətbiqi ilə bağlı müzakirələr aparılır. Bir neçə ölkənin maliyyə nazirləri enerji şirkətlərinin müharibə və geosiyasi gərginliklərdən qazanc əldə etməsinə qarşı daha sərt mexanizmlərin tətbiqini təklif ediblər.

Beynəlxalq Enerji Agentliyinin rəhbəri Fatih Birol isə mövcud vəziyyəti dünya enerji bazarında indiyədək yaşanmış ən böyük şoklardan biri kimi qiymətləndirib.

Paşa Məmmədli