İran Hörmüz boğazını açdı, Tramp təşəkkür etdi

İranın xarici işlər naziri Abbas Əraqçi Hörmüz boğazının bütün kommersiya gəmiləri üçün açıq elan edildiyini bildirib. Onun sözlərinə görə, keçid İranın Limanlar və Dəniz Nəqliyyatı Təşkilatının müəyyən etdiyi marşrut üzrə, İsrail və Livan arasında əldə olunmuş atəşkəs müddətində təmin ediləcək.

Valyuta.az xəbər verir ki, Əraqçi bu barədə “X” sosial şəbəkəsində paylaşım edib. O qeyd edib ki, boğazdan keçid atəşkəsin qüvvədə qaldığı müddətdə fasiləsiz şəkildə açıq olacaq.

ABŞ Prezidenti Donald Tramp da məsələyə münasibət bildirərək, “Truth Social” platformasında İrana təşəkkür edib. “İran indicə elan etdi ki, Hörmüz boğazı tamamilə açıqdır və keçid üçün hazırdır. Təşəkkürlər”, – deyə o yazıb.

Hörmüz boğazı qlobal enerji tədarükü baxımından strateji əhəmiyyətə malikdir və burada hər hansı məhdudiyyət beynəlxalq bazarlara birbaşa təsir göstərir. Son həftələr regionda artan gərginlik fonunda boğazın bağlanması ehtimalı neft qiymətləri və logistika zəncirləri üçün əsas risklərdən biri kimi qiymətləndirilirdi.

Qeyd edək ki, 8 aprel 2026-cı ildə İran, ABŞ və onların müttəfiqləri arasında iki həftəlik atəşkəs razılaşması əldə olunub. Buna baxmayaraq, tərəflər arasında gərginlik tam aradan qalxmayıb və ABŞ hərbi strukturları regionda blokada tədbirlərinin davam etdiyini bəyan edib. Bu isə Hörmüz boğazının statusu ilə bağlı müəyyən qeyri-müəyyənliklərin qalmasına səbəb olur.