Avropa səması "bağlana" bilər: Cəmi bir neçə həftəlik aviasiya yanacağı ehtiyatı var

Beynəlxalq Enerji Agentliyinin (BEA) rəhbəri Fatih Birol bildirib ki, Avropada aviasiya yanacağı ehtiyatı “təxminən altı həftəyə” kifayət edir. 

Valyuta.az xəbər verir ki, bu barədə Euronews məlumat yayıb.

Birolun sözlərinə görə, əgər Hörmüz boğazı yenidən açılmasa, yaxın vaxtlarda “bir şəhərdən digər şəhərə uçuşların yanacaq çatışmazlığı səbəbilə ləğv edildiyi” xəbərləri yayıla bilər.

Məlumata görə, KLM aviaşirkəti artıq Amsterdam–Sxiphol hava limanından gələn ay üçün 160 reysi azaltmağı planlaşdırır ki, bu da onun Avropa marşrutlarının təxminən 1 faizinə bərabərdir.

Hazırda Avstriya, Bolqarıstan və Polşa böyük yanacaq ehtiyatlarına malik ölkələr kimi göstərilir. Böyük Britaniya, İslandiya və Niderlandda vəziyyət daha gərgindir, Fransa isə orta səviyyədə qiymətləndirilir.

Mütəxəssislər bildirirlər ki, yanacaq çatışmazlığının təsiri bütün hava limanlarında eyni olmayacaq. Kiçik daxili hava limanları əsas tranzit mərkəzlərinə nisbətən daha çox risk altındadır.

ING bankının iqtisadçısı Riko Lumanın sözlərinə görə, bu vəziyyətdə regional hava limanları daha ciddi çətinliklərlə üzləşə bilər.

Avropa Hava Limanları Şurası isə Avropa Komissiyasına ünvanladığı məktubda bildirib ki, əgər tankerlərin Hörmüz boğazından keçməsi bərpa olunmasa, aviasiya yanacağı çatışmazlığı mayın əvvəlində başlaya bilər.

Fatih Birol qeyd edib ki, bu vəziyyət qlobal iqtisadi artıma və inflyasiyaya ciddi təsir göstərə bilər və ən çox inkişaf etməkdə olan ölkələr – Asiya, Afrika və Latın Amerikasında yerləşən dövlətlər zərər görəcək. O əlavə edib ki, nəticələr daha sonra Avropa və ABŞ-a da yayılacaq.

Birol həmçinin Hörmüz boğazından keçid üçün rüsum tətbiqini tənqid edərək bildirib ki, belə bir praktikanın davamlı olması digər beynəlxalq su yolları üçün də təhlükəli presedent yarada bilər.

Paşa Məmmədli