Kənd təsərrüfatını inkişaf etdirən 10 perspektivli startap

Su qıtlığı, iqlim dəyişkənliyi, artan istehsal xərcləri və işçi qüvvəsi çatışmazlığı kənd təsərrüfatında daha dəqiq, məlumat əsaslı və resurslara qənaət edən həllərə tələbatı artırır. Bu fonda Avropada fəaliyyət göstərən bir sıra AgriTech startapları fermerlərə sahələr, torpaq və bitkilər haqqında daha ətraflı məlumat əldə etməyə imkan verən innovativ texnologiyalar hazırlayır.

Valyuta.az 2020-ci ildən bu günədək yaradılmış və dəqiq kənd təsərrüfatı sahəsində fəaliyyət göstərən 10 perspektivli startapı təqdim edib.

Siyahıya daxil edilən şirkətlər su ehtiyatlarının idarə olunması, süni intellekt əsaslı analiz, peyk müşahidələri, robot texnikası və bitki sağlamlığının monitorinqi kimi sahələrdə həllər təqdim edir.

İspaniyanın Malaqa şəhərində yerləşən "Agrow Analytics" kənd təsərrüfatı və ağıllı şəhərlər üçün su səmərəliliyini artıran platforma hazırlayıb. Şirkətin texnologiyası su ehtiyatlarını real vaxt rejimində izləyərək istifadəçilərə daha effektiv qərarlar qəbul etməyə kömək edir. Startap indiyədək 1,1 milyon avro investisiya cəlb edib.

Amsterdamda fəaliyyət göstərən "Agurotech" torpaq rütubəti sensorları, hava stansiyaları və məhsul monitorinq sistemlərini bir platformada birləşdirərək fermerlərə sahələr haqqında operativ məlumat təqdim edir. Şirkət ümumilikdə 3,5 milyon avro maliyyə vəsaiti toplayıb.

2021-ci ildə yaradılan "Lualtek" peyk məlumatları və süni intellekt vasitəsilə suvarma proseslərinin optimallaşdırılmasına kömək edir. İtaliyanın Komiso şəhərində yerləşən startapın cəlb etdiyi investisiyanın həcmi 285 min avronu ötür.

Fransada fəaliyyət göstərən "Osiris Agriculture" isə kartof, şəkər çuğunduru və digər bitkilər üçün suvarma, gübrələmə və alaq otlarına qarşı mübarizə işlərini avtomatlaşdıran kənd təsərrüfatı robotları hazırlayır. Şirkət 2,2 milyon avro maliyyələşmə əldə edib.

Danimarkanın paytaxtı Kopenhagendə yaradılan "PerPlant" mövcud kənd təsərrüfatı texnikasına quraşdırılan süni intellekt əsaslı kamera sensorları vasitəsilə bitkilərin vəziyyətini real vaxtda təhlil edir. Startap 1,1 milyon avro investisiya cəlb edib.

Almaniyanın Bonn şəhərində fəaliyyət göstərən "Pheno-Inspect" dronlar, smartfonlar və peyklər vasitəsilə əldə olunan görüntüləri emal edən süni intellekt platforması hazırlayıb. Şirkət bitki inkişafı, xəstəliklər və məhsuldarlıqla bağlı analizlər təqdim edir.

İtaliyanın Parma şəhərində yerləşən "PlantBit" bitkilərin sağlamlığını real vaxtda izləyən biosensorlar üzərində işləyir. Şirkətin hazırladığı texnologiya fermerlərə su istifadəsini azaltmağa və məhsuldarlığı artırmağa kömək edir.

Digər İtaliya startapı olan "Plantvoice" bitki gövdəsinə yerləşdirilən biosensorlar vasitəsilə su çatışmazlığı, qida maddələri çatışmazlığı və xəstəlik əlamətlərini erkən mərhələdə müəyyən etməyə imkan yaradır.

Macarıstanın paytaxtı Budapeştdə fəaliyyət göstərən "Proofminder" süni intellekt və dron görüntülərindən istifadə etməklə bitki sağlamlığını yarpaq səviyyəsində analiz edir. Şirkətin texnologiyası xəstəliklərin, zərərvericilərin və su basması risklərinin vaxtında aşkarlanmasına şərait yaradır.

Siyahının ən gənc iştirakçılarından biri olan Belçikanın Gent şəhərində yerləşən "Sensie" isə bitkilər üçün "geyilə bilən" sensorlar hazırlayır. Bu sensorlar bitkilərin böyümə sürətini, su vəziyyətini və stress səviyyəsini izləyərək fermerlərə daha dəqiq qərarlar qəbul etməyə imkan verir.

Mütəxəssislərin fikrincə, bu texnologiyalar yaxın illərdə kənd təsərrüfatında məhsuldarlığın artırılması, su sərfiyyatının azaldılması və davamlı istehsalın təmin olunmasında mühüm rol oynaya bilər.

Sərvanə Rəmixanova